హిందూపురాన్ని జిల్లా కేంద్రంగా ప్రకటించాలి

ఎమ్మెల్యే నందమూరి బాలకృష్ణ

హిందూపురంఅర్బన్‌, న్యూస్‌టుడే: ‘జిల్లా కేంద్రాల విషయంలో రాజకీయం చేయొద్దు. ప్రజల అభిప్రాయాలను గౌరవించి పార్లమెంటు నియోజకవర్గ కేంద్రమైన హిందూపురాన్ని జిల్లా కేంద్రంగా ప్రకటించాలి’ అని హిందూపురం ఎమ్మెల్యే నందమూరి బాలకృష్ణ డిమాండు చేశారు. ఈమేరకు గురువారం ఆయన వీడియో సందేశం పంపించారు. ‘’రాష్ట్రంలో 13 కొత్త జిల్లాలను ఏర్పాటు చేయడం స్వాగతించాల్సిన విషయం. హామీ ఇచ్చినట్లుగా ప్రతి పార్లమెంటు నియోజకవర్గ కేంద్రాన్ని జిల్లా కేంద్రంగా గుర్తించాలి. హిందూపురం వ్యాపార, వాణిజ్య, పారిశ్రామిక రంగాల్లో ఎంతో అభివృద్ధి చెందింది. ఇక్కడ జిల్లా కార్యాలయాల ఏర్పాటుకు అవసరమైన భూమి ఉంది. పట్టణాన్ని జిల్లా కేంద్రంగా గుర్తించి శ్రీసత్యసాయి జిల్లాగా నామకరణం చేయాలి’’ అని ప్రభుత్వాన్ని డిమాండు చేశారు.