Polavaram Project: డయాఫ్రమ్‌ వాల్‌ కొత్తది నిర్మించాలా?: పోలవరంపై సమీక్ష

అమరావతి: పోలవరం ప్రాజెక్టు నిర్మాణ పనులపై కేంద్ర జలశక్తి శాఖ సలహాదారు వెదిరె శ్రీరామ్‌ నేతృత్వంలో క్షేత్రస్థాయిలో సమీక్ష నిర్వహిస్తున్నారు. దెబ్బతిన్న డయాఫ్రమ్‌ వాల్‌ నిర్మాణంపై ప్రధానంగా చర్చ జరుగుతోంది. పోలవరం ప్రాజెక్టు వద్దే జరుగుతున్న ఈ సమీక్ష సమావేశంలో పోలవరం ప్రాజెక్టు అథారిటీ సీఈవో చంద్రశేఖర్‌ అయ్యర్‌, రాష్ట్ర జలవనరుల శాఖ మంత్రి అంబటి రాంబాబు సహా మరికొందరు అధికారులు హాజరయ్యారు. డయాఫ్రమ్‌ వాల్‌ నిర్మాణానికి సంబంధించి ఇప్పటికే కేంద్ర జల శక్తి శాఖ పలు దఫాలుగా సమీక్ష నిర్వహించింది.

రెండు చోట్ల దెబ్బతిన్న డయాఫ్రమ్‌ వాల్‌ పునర్నిర్మాణంపై కేంద్ర జలవనరుల శాఖ ఉన్నతాధికారులతో పాటు దిల్లీ ఐఐటీ నిపుణులు ఇచ్చిన సలహాలపై సమావేశంలో చర్చిస్తున్నారు. పోలవరంలో మిగిలిన సమస్యలపైనా సమీక్షిస్తున్నారు. స్పిల్‌ ఛానల్‌, అప్రోచ్‌ ఛానల్‌ పనులు, రాక్‌ఫిల్‌ డ్యామ్‌ నిర్మాణంపై సమావేశంలో చర్చ జరుగుతోంది. ఎర్త్‌ కమ్‌ రాక్‌ఫిల్‌ డ్యామ్‌ నిర్మాణం చేపట్టాలంటే ముందుగా డయాఫ్రమ్‌ వాల్‌ పూర్తి కావాల్సి ఉంది. ప్రస్తుతం దెబ్బతిన్న ప్రాంతంలోనే డయాఫ్రమ్‌ వాల్‌ నిర్మించాలా? లేక కొత్తది నిర్మించాలా? అనే అంశంపై అధికారులు చర్చిస్తున్నారు.