Andhra News: ముగ్గురు విద్యార్థుల అదృశ్యం ఘటన విషాదాంతం

వాసు, చెంచు మహేష్, జగన్‌

టంగుటూరు: ప్రకాశం జిల్లా టంగుటూరు మండలం ఎం.నిడమానూరులో విషాదం నెలకొంది. ఆదివారం ముగ్గురు విద్యార్థులు అదృశ్యమైన ఘటన విషాదాంతమైంది. కనిపించకుండా పోయిన ముగ్గురు విద్యార్థులూ విగతజీవులుగా మారారు. పొందూరు సమీపంలో పొదవారిపాలెం వద్ద మూసీ వాగులో వారి మృతదేహాలు లభ్యమయ్యాయి. మృతులను వాసు(15), జగన్‌(12), మహేశ్‌(13)గా గుర్తించారు.

వివరాల్లోకి వెళితే.. ఈ ముగ్గురు విద్యార్థులు నిడమానూరులోని జిల్లా పరిషత్‌ ఉన్నత పాఠశాలలో చదువుతున్నారు. ఆదివారం మధ్యాహ్నం వరకు ఇళ్ల వద్దే ఉన్న వీరు 3గంటల సమయంలో క్రికెట్‌ ఆడేందుకు పొందూరు పంచాయతీ పొదవారిపాలెం సమీపంలోని మూసీ వాగు వద్దకు వెళ్లారు. అనంతరం ముగ్గురు విద్యార్థులు ఈతకు ఉపక్రమించగా.. సమీపంలో వ్యవసాయ పనులు చేస్తున్న రైతులు వారించి పంపారు. సాయంత్రమైనా పిల్లలు ఇళ్లకు చేరకపోవడంతో తల్లిదండ్రులు ఆందోళన చెందారు. కాలనీ వాసులతో కలిసి విస్తృతంగా గాలించారు. ప్రయోజనం లేకపోవడంతో మూసీ వాగు వద్దకు వచ్చినట్టు తెలుసుకుని అక్కడా వెతికారు. సమాచారం అందుకున్న పోలీసులు ప్రత్యేక దళాలతో గాలించారు. నిన్న రాత్రి పొద్దుపోయేటప్పటికీ విద్యార్థుల ఆచూకీ లభించలేదు. ఈ ఉదయం మరోసారి గాలించగా మృతదేహాలు బయటపడ్డాయి. విగతజీవులుగా మారిన పిల్లలను చూసి తల్లిదండ్రులు కన్నీరుమున్నీరుగా విలపించారు.