రన్‌వేపై పక్కపక్కనే!

ఒకే సారి దూసుకొచ్చిన హైదరాబాద్‌, బెంగళూరు బోయింగ్‌ విమానాలు
దుబాయ్‌ విమానాశ్రయంలో తృటిలో తప్పిన ప్రమాదం

దుబాయ్‌: ఒకే సారి దుబాయ్‌ అంతర్జాతీయ విమానాశ్రయంలో రెండు విమానాలు టేకాఫ్‌కు ప్రయత్నించాయి. చివరి క్షణంలో అధికారులు అప్రమత్తమవ్వడంతో పెను ప్రమాదం తప్పింది.  ఈ సంఘటనలో రెండు ఎమిరేట్‌ బోయింగ్‌-బి777 విమానాలు హైదరాబాద్‌, బెంగళూరుకు వెళ్లాల్సినవే కావడం గమనార్హం. దుబాయ్‌ విమానాశ్రయ వర్గాల ప్రకారం... ఈ నెల 9న దుబాయ్‌ నుంచి హైదరాబాద్‌కు వెళ్లే ఈకే-524 విమానం ఆదివారం రాత్రి 9.45 గంటలకు టేకాఫ్‌ కావాలి. ఐదు నిమిషాల వ్యవధిలోనే బెంగళూరు ఈకే-568 విమానమూ బయల్దేరాలి. అయితే, ఈ రెండు ఒకేసారి 30ఆర్‌ రన్‌వేపైకి వచ్చేశాయి. హైదరాబాద్‌ విమానం టేకాఫ్‌ కోసం రన్‌వేపై శరవేగంగా దూసుకెళుతున్న సమయంలో పక్కనుంచి మరో విమానం వేగంగా వస్తుండడాన్ని సిబ్బంది గమనించారు. దీంతో ఎయిర్‌ ట్రాఫిక్‌ కంట్రోల్‌ (ఏటీసీ) టేకాఫ్‌ను నిలిపివేయాలని ఈకే-524 పైలట్లకు సూచించింది. దీంతో 240 కిలోమీటర్ల వేగంతో ఉన్న హైదరాబాద్‌ విమానం... అతి కష్టంపై వేగాన్ని నియంత్రించుకొని ట్యాక్సీవేలోకి మళ్లి రన్‌వే నుంచి వైదొలగింది. ఈ ఘటనపై యూఏఈ విమాన ప్రమాద దర్యాప్తు సంస్థ(ఏఏఐఎస్‌) విచారణకు ఆదేశించింది. దీనిపై భారత్‌ పౌర విమానయాన డైరెక్టరేట్‌ జనరల్‌ కూడా స్పందించింది. తమకూ విచారణ నివేదిక ప్రతిని సమర్పించాలని యూఏఈ విమానయాన సంస్థను కోరింది. బోయింగ్‌-బి777 సీట్ల సామర్థ్యం 350 నుంచి 440గా ఉంటుంది. ఆ సమయంలో ఈ రెండు విమానాల్లో ఎంత మంది ఉన్నారో తెలీదు.