30 నెలల్లో నీటిపారుదల రంగంలో ఏం చేశారో?

మాజీ మంత్రి దేవినేని ఉమామహేశ్వరరావు

ఈనాడు, అమరావతి: గత 30 నెలల్లో రాష్ట్రంలో ఏ ప్రాజెక్టుకి ఎంత ఖర్చు పెట్టారు, ఎంత శాతం పనులు చేశారో? వాస్తవాలతో శ్వేతపత్రం ప్రజల ముందు ఉంచే దమ్ము, ధైర్యం ముఖ్యమంత్రి, జలవనరులశాఖ మంత్రికి ఉందా? అని మాజీ మంత్రి, తెదేపా నేత దేవినేని ఉమామహేశ్వరరావు ప్రశ్నించారు. పోలవరం ప్రాజెక్టు ఎప్పుడు పూర్తి చేస్తారన్న ప్రజలకు సమాధానం చెప్పలేక అసహనంతో మంత్రి అనిల్‌కుమార్‌ అక్కసు వెళ్లగక్కుతున్నారని ఎద్దేవా చేశారు. దేవినేని గురువారం విలేకరులతో మాట్లాడారు. ‘తెదేపా హయాంలో పోలవరం ప్రాజెక్ట్‌కి ఖర్చుపెట్టిన నిధుల్లో జగన్‌రెడ్డి తన 30 నెలల పాలనలో రూ.4 వేల కోట్ల వరకు కేంద్రం నుంచి పొందారు. చంద్రబాబు హయాంలో పనులు 71 శాతం వరకు పూర్తయితే...జగన్‌రెడ్డి ఎంత శాతం పనులు చేశారని ప్రజలు అడుగుతుంటే మంత్రి ఎందుకు సమాధానం చెప్పలేకపోతున్నారు’ అని ప్రశ్నించారు.