వైఎస్‌ విగ్రహం చేయి ధ్వంసం

వైకాపా నాయకుల ధర్నా, రాస్తారోకో

శ్రీరంగరాజపురం, న్యూస్‌టుడే: చిత్తూరు జిల్లా శ్రీరంగరాజపురం ఎంపీడీవో కార్యాలయం ముందున్న దివంగత మాజీ సీఎం వైఎస్‌ రాజశేఖరరెడ్డి విగ్రహం కుడిచేయిని గుర్తుతెలియని వ్యక్తులు శుక్రవారం అర్ధరాత్రి ధ్వంసం చేశారు. ముఖాన్ని సైతం పాక్షికంగా విరగ్గొట్టారు. శనివారం స్థానికులు గుర్తించి స్థానిక వైకాపా నాయకులకు సమాచారమిచ్చారు. నిందితులను గుర్తించి చర్యలు తీసుకోవాలంటూ ఆర్టీసీ వైస్‌ఛైర్మన్‌ విజయానందరెడ్డి ఆధ్వర్యంలో వైకాపా నాయకులు ఎంపీడీవో కార్యాలయం ఎదుట శనివారం ధర్నా, రాస్తారోకో చేపట్టారు. తెదేపావారే ఈ దుశ్చర్యకు పాల్పడి ఉంటారని ఆరోపించారు. అనంతరం పోలీసులకు ఫిర్యాదు చేశారు. ఉపముఖ్యమంత్రి నారాయణస్వామి అక్కడికి వచ్చి నాయకులతో మాట్లాడారు. నిందితులను శిక్షించాలని పోలీసులను ఆదేశించారు. వైకాపా నాయకులకు నచ్చజెప్పడంతో వారు ధర్నా విరమించారు. కేసు నమోదు చేశామని పోలీసులు చెప్పారు.