పార్టీ కార్యకర్తలా.. రౌడీలా?

తెదేపా నేత బొండా ఉమా మండిపాటు

వైకాపా నేతల వీడియోల విడుదల

ఈనాడు, అమరావతి: వైకాపా నాయకులు రౌడీల్లా ప్రవర్తించారని తెదేపా పొలిట్‌బ్యూరో సభ్యుడు బొండా ఉమామహేశ్వరరావు ఆరోపించారు. గుడివాడలో మంత్రి కొడాలి నానికి చెందిన కె-కన్వెన్షన్‌లో క్యాసినోలో చిందులు వేసిన నాయకులే తమపై హత్యాయత్నం చేశారని, తన కారును ధ్వంసం చేశారని ఆరోపించారు. దీనికి సంబంధించిన వీడియోలను, ఫొటోలను మీడియాకు ఆయన విడుదల చేశారు. వైకాపా మండల పార్టీ అధ్యక్షుడు జాన్‌ విక్టర్‌ రాళ్లతో దాడి చేశారని, తన కారుపై రాయితో దాడి చేస్తున్న చిత్రం ఉందని ఉమా వెల్లడించారు. ఇదే వ్యక్తి మంత్రి కొడాలి నానితో సన్నిహితంగా ఉన్న చిత్రాలను విడుదల చేశారు. సంక్రాంతి సంబరాల్లో కె-కన్వెన్షన్‌లో డాన్సులు చేస్తున్న వీడియోను చూపించారు. మంత్రికి ముఖ్య సన్నిహితుడుగా ఉన్న మరో నాయకుడు శశిభూషణ్‌ కూడా రాళ్లు రువ్వారని ఆరోపించారు. ఇన్ని సాక్ష్యాలు కనిపిస్తుంటే.. తెదేపా రెచ్చగొట్టినట్లు జిల్లా ఎస్పీ, డీఐజీ ఎలా చెబుతారని ఆయన ప్రశ్నించారు. వీడియోలు, సీసీటీవీ ఫుటేజీ పరిశీలిస్తే.. గుడివాడ ఘటనల నిజస్వరూపం, పోలీసులు అధికారపార్టీకి సహకరించిన వైనం వెలుగుచూస్తాయని ఆయన మండిపడ్డారు.