సీఎం జగన్‌కు కూల్చడం తప్ప కట్టడం రాదు

తెదేపా అధినేత చంద్రబాబు మండిపాటు

ఈనాడు డిజిటల్‌, అమరావతి: కూల్చడం తప్ప కట్టడం చేతగాని ముఖ్యమంత్రి జగన్‌ వైఖరితో రాష్ట్రంలో శిథిలాలే మిగులుతున్నాయని తెదేపా అధినేత చంద్రబాబు ధ్వజమెత్తారు. రోజురోజుకూ రాష్ట్రంలో వైకాపా నేతల అరాచకాలకు అడ్డే లేకుండా పోతోందని దుయ్యబట్టారు. ‘శ్రీకాకుళం జిల్లా నరసన్నపేటలో నిర్మాణంలో ఉన్న ఎర్రన్నాయుడు చిల్డ్రన్‌ పార్కులో కూల్చివేతలు దారుణం. ప్రభుత్వ ఆస్తులు ధ్వంసమవుతుంటే ఉపముఖ్యమంత్రిగా ఉన్న స్థానిక ఎమ్మెల్యే ఏం చేస్తున్నారు? మీకు ఓట్లేసింది ప్రభుత్వ ఆస్తులు ఆక్రమించడానికి కాదని గుర్తించండి. నరసన్నపేటలో వైకాపా నేతల బరితెగింపును అడ్డుకోలేని అధికారులు ప్రజలకు సమాధానం చెప్పాల్సిందే’ అని ఆదివారం ట్వీట్‌ చేశారు.