Beeda Mastan Rao: రాజ్యసభ టికెట్‌కు రూ.200 కోట్లైనా ఇచ్చేవారున్నారు: బీద మస్తాన్‌రావు

వైకాపా అభ్యర్థి బీద మస్తాన్‌రావు 

ఈనాడు, అమరావతి: రాజ్యసభ టికెట్‌ను రూ.100 కోట్లకు అమ్ముకున్నారంటూ తెదేపా బురదజల్లే రాజకీయం చేస్తోందని వైకాపా అభ్యర్థి బీద మస్తాన్‌రావు పేర్కొన్నారు. ‘రూ.100 కోట్లు తీసుకుని ఎంపీ టికెట్‌ ఇచ్చేలా ఉంటే రూ.200 కోట్లు ఇచ్చేందుకైనా ఓసీ అభ్యర్థులు సిద్ధంగా ఉంటారు’ అని వ్యాఖ్యానించారు. ‘వైకాపా అధికారంలో ఉంది. అధికారంలో ఉన్నప్పుడు డబ్బుతో ఏమి అవసరం ఉంటుంది? రూ.10 కోట్లు, రూ.100 కోట్లతోనే కాలం గడిచిపోతుందా’ అని ప్రశ్నించారు. ‘గతంలో పిల్లి సుభాష్‌ చంద్రబోస్‌, మోపిదేవి వెంకటరమణలకు టికెట్లు ఇచ్చారు. వారి నుంచి ఏ డబ్బు తీసుకుని టికెట్లు ఇచ్చారు? ఆర్‌.కృష్ణయ్య ఆర్థిక స్థితి అందరికీ తెలుసు’ అని వ్యాఖ్యానించారు. గురువారం ముఖ్యమంత్రి క్యాంపు కార్యాలయంలో సీఎం జగన్‌ను మస్తాన్‌రావు కలిశారు. తనకు రాజ్యసభ టికెట్‌ కేటాయించినందుకు ధన్యవాదాలు తెలిపారు. తర్వాత అక్కడే విలేకరులతో మాట్లాడారు.