సోనియా గాంధీతో కిరణ్‌కుమార్‌రెడ్డి భేటీ

ఈనాడు, దిల్లీ : ఏఐసీసీ అధ్యక్షురాలు సోనియాగాంధీతో మాజీ ముఖ్యమంత్రి కిరణ్‌కుమార్‌రెడ్డి భేటీ అయ్యారు. విశ్వసనీయ సమాచారం మేరకు... సోనియాగాంధీ నివాసంలో శుక్రవారం సుమారు 45 నిమిషాలపాటు భేటీ సాగింది. ఇందులో.. తెలుగు రాష్ట్రాలతో పాటు దేశవ్యాప్తంగా కాంగ్రెస్‌ బలోపేతానికి చేపట్టాల్సిన చర్యలపై చర్చించారు. ఆంధ్రప్రదేశ్‌లో పార్టీ పూర్వ వైభవానికి తీసుకోవాల్సిన చర్యలపై మాట్లాడారు. తెలంగాణలో పార్టీ ప్రతిపక్షంలో ఉన్నా బలంగా ఉండడం, ఇటీవల రాహుల్‌గాంధీ సభ విజయవంతం కావడం, పార్టీలో చేరేందుకు పలువురు ఆసక్తి చూపుతున్న తీరుపై చర్చించారు. మరింత క్రియాశీలంగా ఉండాలని, ఏపీలో పార్టీ బలోపేతంపై దృష్టిసారించాలని సోనియా కిరణ్‌కుమార్‌రెడ్డికి సూచించారు. తెలంగాణ ప్రాంతంపై పూర్తి అవగాహన ఉండడం, పార్టీ నేతలతో ఉన్న సంబంధాల దృష్ట్యా అక్కడ అవసరమైనప్పుడు నేతలకు తగిన సలహాలు, సూచనలు అందించాలని ఆయనకు తెలిపారు. ఎక్కువగా జాతీయ రాజకీయాలపైనే చర్చ సాగిందని తెలిసింది.