తెలంగాణలో కొత్త సైన్యం అవసరం: బక్కని నర్సింహులు

మహానాడు ప్రాంగణం నుంచి ఈనాడు ప్రత్యేక ప్రతినిధి: తెలంగాణలో తెలుగుదేశానికి కొత్త సైన్యాన్ని తయారు చేసుకోవాల్సిన అవసరం ఉందని తెదేపా తెలంగాణ శాఖ అధ్యక్షుడు బక్కని నర్సింహులు పేర్కొన్నారు. తెలంగాణను అభివృద్ధి చేసింది తెదేపాయేనని, ఎన్టీఆర్‌ పాలనలోనే తెలంగాణకు నిజమైన స్వాతంత్య్రం లభించిందని వివరించారు. మహానాడులో శుక్రవారం ఆయన ప్రారంభోపన్యాసం చేశారు. ‘‘తెలంగాణ ప్రభుత్వం దళితులకు మూడెకరాల భూమి ఇవ్వలేదు. రెండు పడకగదుల ఇళ్ల పథకం చెరువులోకి వెళ్లిపోయింది. ప్రాంతీయ అసమానతలు లేకుండా ఎన్టీఆర్‌, చంద్రబాబు పాలించారు. తెలంగాణలో పార్టీకి పూర్వ వైభవం తెచ్చేలా కృషి చేస్తాం. హైదరాబాద్‌కు బిల్‌క్లింటన్‌, బిల్‌గేట్స్‌ వంటి వారిని రప్పించిన ఘనత చంద్రబాబుదే. మహిళా సాధికారత చంద్రబాబు వల్లే సాధ్యమైంది. 14 నెలల్లోనే హైటెక్‌ సిటీ నిర్మించారు. ప్రత్యక్షంగా, పరోక్షంగా లక్షల మందికి ఉద్యోగాలిప్పించారు. ఉపాధి కల్పించారు’’ అని నర్సింహులు వివరించారు.