వచ్చే ఎన్నికల్లో తెదేపా, జనసేన, వామపక్షాల ఉమ్మడి పోటీ: మండలి మాజీ ఛైర్మన్‌ షరీఫ్‌

తూర్పుతాళ్ళు (నరసాపురం గ్రామీణ), న్యూస్‌టుడే: వైకాపాను ఓడించేందుకు 2024 అసెంబ్లీ ఎన్నికల్లో తెదేపా, జనసేన, వామపక్షాలు కలిసి పోటీ చేస్తాయని తెదేపా పొలిట్‌బ్యూరో సభ్యుడు, శాసనమండలి మాజీ ఛైర్మన్‌ మహ్మద్‌ అహ్మద్‌ షరీఫ్‌ పేర్కొన్నారు. పశ్చిమగోదావరి జిల్లా నరసాపురం మండలం తూర్పుతాళ్ళులో బుధవారం నిర్వహించిన ‘తెదేపా గౌరవ సభ’ కార్యక్రమంలో ఆయన మాట్లాడారు. వైకాపా పాలనకు ప్రజలు చరమగీతం పాడాలని పిలుపునిచ్చారు. ‘రాష్ట్రంలో రాజకీయ పరిస్థితులు చూస్తుంటే బిహార్‌ తరహా పరిస్థితులను వైకాపా ప్రభుత్వం ప్రోత్సహిస్తున్నట్లుగా ఉంది. భద్రతతో కూడిన, ప్రశాంతమైన పాలనకు తెదేపాను ప్రజలు ఆదరించాలి. వైకాపా ప్రభుత్వం అరాచకంగా, అసమర్థంగా పాలన సాగిస్తోంది’ అని ఆయన ధ్వజమెత్తారు. స్థానిక సమస్యలపై కార్యకర్తలు స్పందించి వాటి పరిష్కారానికి ప్రజలకు అండగా నిలవాలని సూచించారు.