జనవరి 23న రాష్ట్రస్థాయి ఎన్‌టీఎస్‌ పరీక్ష

ఈనాడు, హైదరాబాద్‌: ఇంటర్‌ నుంచి ఆపై చదువులకు 2021-22 విద్యాసంవత్సరంలో ఉపకార వేతనాలు అందించేందుకు తెలంగాణలో (రాష్ట్ర స్థాయి) జాతీయ ప్రతిభా అన్వేషణ పరీక్ష-1(ఎన్‌టీఎస్‌)ను జనవరి 23వ తేదీన(ఆదివారం) నిర్వహించనున్నారు. ఈ మేరకు జాతీయ విద్యా పరిశోధన, శిక్షణ మండలి(ఎన్‌సీఈఆర్‌టీ) ప్రకటించింది. ఆ రోజు ఏపీ సహా పశ్చిమ్‌బెంగాల్‌లో రాష్ట్ర స్థాయి పరీక్షలుంటాయని పేర్కొంది. అలాగే, జాతీయస్థాయి పరీక్ష(ఎన్‌టీఎస్‌ఈ-2)ను వచ్చే జూన్‌ 12న జరపాలని నిర్ణయించింది. దేశవ్యాప్తంగా 2 వేల మందిని ఉపకారవేతనాలకు ఎంపిక చేస్తారు. ఎంపికైన వారికి ఇంటర్‌లో రెండేళ్లపాటు నెలకు రూ.1250 చొప్పున, డిగ్రీ నుంచి పీజీ వరకు నెలకు రూ.2 వేల చొప్పున అందజేస్తారు.