రాజధానిపై ఎందుకీ సందిగ్ధత?

అమరావతి రైతుల ప్రశ్న

తుళ్లూరు గ్రామీణం, న్యూస్‌టుడే: రాష్ట్రం విడిపోయి దాదాపు ఏడున్నరేళ్లు అవుతున్నా.. ఇంకా రాజధాని ఏదో ఎవరికీ చెప్పలేని స్థితిలోకి వైకాపా ప్రభుత్వం నెట్టిందని అమరావతి రైతులు విమర్శించారు. మూడు రాజధానుల పేరుతో ఆడుతున్న రాజకీయ క్రీడకు ఇకనైనా ముగింపు పలికి అభివృద్ధిపై దృష్టి పెట్టాలని హితవు పలికారు. నిర్మాణంలో ఉన్న రాజధానిని వదిలేసి, మూడు ప్రాంతాల మధ్య వైషమ్యాలు సృష్టించడం ఆయన స్థాయికి తగదన్నారు. మూడు రాజధానుల నిర్ణయాలను వ్యతిరేకిస్తూ అమరావతిలో అన్నదాతలు చేస్తున్న నిరసనలు బుధవారం 764వ రోజుకు చేరాయి. అమరావతి కొనసాగాలని తుళ్లూరులో మహిళలు న్యాయదేవతకు పూజలు చేసి, గీతాపారాయణం చేశారు. కృష్ణాయపాలెం, మందడం, దొండపాడు, వెలగపూడి, మోతడక, పెదపరిమి తదితర గ్రామాల్లో నిరసనలు కొనసాగాయి. తెలుగు రైతు రాష్ట్ర కార్యనిర్వాహక కార్యదర్శి రాటకొండ మధుబాబు, రాజంపేట పార్లమెంటు రైతు నాయకుడు వెంకటేష్‌, తదితరులు వెలగపూడి దీక్షా శిబిరాన్ని సందర్శించి.. మద్దతు తెలిపారు.