సచివాలయం ఉద్యోగుల ర్యాలీ

ఈనాడు, అమరావతి: తమ ఆకాంక్షలకు వ్యతిరేకంగా ప్రభుత్వం పీఆర్సీ ఉత్తర్వులను వెలువరించిందని మండిపడుతూ రాష్ట్ర సచివాలయంలో ఉద్యోగులు గురువారం ఆందోళన చేశారు. అంతా నల్లబ్యాడ్జీలు ధరించి విధులకు హాజరయ్యారు. సోమవారం నుంచి ఉద్యమాన్ని తీవ్రం చేయాలని నిర్ణయించారు. ఈమేరకు రాష్ట్ర సచివాలయ ఉద్యోగుల సంఘం అధ్యక్షుడు కె.ఆర్‌.వెంకట్రామిరెడ్డి నేతృత్వంలో ఉద్యోగులు సమావేశమై చర్చించారు. సచివాలయ ఉద్యోగులు ఆందోళన తెలపాల్సిన విధానం, భవిష్యత్తు కార్యాచరణపై చర్చించారు. అనంతరం సచివాలయం గేటు నుంచి మొదటి బ్లాకు వరకు ర్యాలీ నిర్వహించారు. అనంతరం రాష్ట్ర సచివాలయ ఉద్యోగుల సంఘం అధ్యక్షుడు కె.ఆర్‌.వెంకట్రామిరెడ్డి, ప్రభుత్వ ఉద్యోగుల సంఘం రాష్ట్ర అధ్యక్షుడు కె.ఆర్‌.సూర్యనారాయణ భేటీ అయ్యారు.