పోలీసు నిర్బంధం మధ్య బోధన

పలమనేరు, న్యూస్‌టుడే: చిత్తూరు జిల్లా గంగవరం మండలం కీలపట్ల ప్రభుత్వ ప్రాథమిక పాఠశాల ఉపాధ్యాయుడు, ఏపీటీఎఫ్‌ ఉపాధ్యాయ పత్రికా సంపాదకుడు పి.తులసీనాథం నాయుడును గురువారం నిద్రలేచిన దగ్గర నుంచి పోలీసులు వెంటాడారు. జిల్లాలోని అన్ని ప్రాంతాల్లో ఉపాధ్యాయ సంఘాల నాయకులను పోలీసులు గృహనిర్బంధం చేశారు. ఉదయమే పోలీసులు ఆయన వద్దకు వచ్చి కదలనీయలేదు. తాను పిల్లలకు పాఠాలు చెప్పాలని బతిమాలితే... తాము కూడా వెంట వస్తామని తెలిపారు. దాంతో కానిస్టేబుల్‌ను పక్కనే పెట్టుకుని ఉదయం నుంచి స్కూల్‌ వదిలే వరకు ఆయన పిల్లలకు పాఠాలు బోధించాల్సి వచ్చింది. ‘పోలీసు నిర్బంధంలో పాఠ్యాంశాలు బోధిస్తానని కలలో కూడా అనుకోలేదు’ అని ఆయన వాపోయారు.