నేటి నుంచి రోజుకు వెయ్యి మంది కొవిడ్‌ బాధితులకు వైద్యం

ఎన్టీఆర్‌ ట్రస్ట్‌ మేనేజింగ్‌ ట్రస్టీ నారా భువనేశ్వరి

ఈనాడు, అమరావతి: కొవిడ్‌ కేసులు పెరుగుతున్న నేపథ్యంలో శుక్రవారం నుంచి జూమ్‌ ద్వారా రోజుకు వెయ్యి మందికి వైద్య సలహాలు, అవసరమైన సహాయం అందించనున్నట్లు ఎన్టీఆర్‌ ట్రస్ట్‌ మేనేజింగ్‌ ట్రస్టీ నారా భువనేశ్వరి వెల్లడించారు. గురువారం 360 మంది కొవిడ్‌ బాధితులకు వైద్య సహాయం, మందులను అందించామని ఆమె ఒక ప్రకటనలో తెలిపారు. ‘తెలుగుదేశం వర్గాల ద్వారా జూమ్‌ లింక్‌ను ప్రజలకు అందే ఏర్పాటు చేశాం. ప్రతిరోజు ఉదయం 7.30 గంటలకు టెలిమెడిసిన్‌ ప్రక్రియ పారంభం అవుతుంది. ఎన్టీఆర్‌ ట్రస్ట్‌ సేవలకు తోడ్పాటు అందించేందుకు పలువురు ముందుకు వస్తున్నారు. తెలుగుదేశం వైద్య విభాగం అధ్యక్షుడు జడ్‌.శివప్రసాద్‌ 5వేల మందికి మందులు అందిస్తున్నారు. అదనంగా వైద్యులు, సిబ్బందిని నియమించుకుని ఎక్కువ మంది రోగులకు సహాయపడేలా ప్రణాళికలు సిద్ధం చేశాం...’ అని భువనేశ్వరి వివరించారు.