మెరుపు సమ్మెకు దిగుతాం

విద్యుత్తు ఉద్యోగుల హెచ్చరిక

ఈనాడు డిజిటల్‌, కడప: తమ సమస్యలను ప్రభుత్వం పరిష్కరించని పక్షంలో మెరుపు సమ్మె చేయడానికి వెనకాడబోమని విద్యుత్తు ఉద్యోగుల ఐకాస రాష్ట్ర ఛైర్మన్‌ చంద్రశేఖర్‌ హెచ్చరించారు. శనివారం కడపలో రాష్ట్ర స్థాయి విద్యుత్తు ఉద్యోగుల సదస్సు జరిగింది. ఈ సందర్భంగా ఆయన మాట్లాడుతూ... ‘సోమవారం ఎన్జీవోల ఆందోళనకు విద్యుత్తు ఉద్యోగులు సంఘీభావం తెలియజేస్తారు. విద్యుత్తు ఉద్యోగుల డిమాండ్లపై సోమవారమే యాజమాన్యానికి వినతిపత్రం అందచేస్తాం. ప్రభుత్వం పరిష్కరించని పక్షంలో ఆందోళనకు దిగుతాం. నెల కిందటే మంత్రి బాలినేని శ్రీనివాసరెడ్డి, ప్రభుత్వ సలహాదారు సజ్జల రామకృష్ణారెడ్డిని కలిసి తమ డిమాండ్ల గురించి వివరించగా... ఎలాంటి స్పందన రాలేదు’ అని మండిపడ్డారు. సదస్సులో నాయకులు ప్రతాప్‌రెడ్డి, సాయికుమార్‌, శివయ్య, రమేష్‌బాబు, వెంకటచలపతి, శివశంకర్‌, సుదర్శన్‌రెడ్డి, వీరభద్రయ్య పాల్గొన్నారు.