విద్యుత్‌ టారిఫ్‌పై నేటి నుంచి ప్రజాభిప్రాయ సేకరణ

ఈనాడు, అమరావతి: విద్యుత్‌ వినియోగదారులపై ఛార్జీల భారం వేయాలన్న విద్యుత్‌ పంపిణీ సంస్థల (డిస్కంల) ప్రతిపాదనలపై ప్రజాభిప్రాయ సేకరణకు బహిరంగ విచారణను రాష్ట్ర విద్యుత్‌ ,నియంత్రణ మండలి (ఏపీఈఆర్‌సీ) సోమవారం చేపట్టనుంది. కరోనా నేపథ్యంలో విశాఖపట్నంనుంచి సోమ, మంగళ, గురువారాల్లో వర్చువల్‌ విధానంలో బహిరంగ విచారణ నిర్వహిస్తుంది. విద్యుత్‌ ఛార్జీల పెంపు ప్రతిపాదనపై ప్రజల అభిప్రాయాలను సేకరిస్తుంది. డిస్కంలు దాఖలు చేసిన ప్రతిపాదనలు.. ప్రజాభిప్రాయాన్ని పరిగణనలోకి తీసుకుని ఛార్జీల పెంపు ఆమోదించాలా లేదా? అని ఏపీఈఆర్‌సీ నిర్ణయిస్తుంది. బహిరంగ విచారణలో పాల్గొనేవారు పేర్లను వెబ్సైట్‌ ద్వారా నమోదు చేసుకునే అవకాశం కల్పించింది. మొత్తం 65 మంది బహిరంగ విచారణలో పాల్గొనటానికి దరఖాస్తు చేసుకున్నారు. వారికి ఏపీఈఆర్‌సీ వెబ్‌లింక్‌ను పంపింది. పేర్లు నమోదు చేసుకోకున్నా బహిరంగ విచారణలో పాల్గొనాలని భావిస్తే విద్యుత్‌ పర్యవేక్షణ ఇంజినీరు (ఎస్‌ఈ), ఎగ్జిక్యూటివ్‌ ఇంజనీరు (ఈఈ) కార్యాలయాల్లో సంప్రదిస్తే అవకాశం కల్పిస్తారని ఏపీఈఆర్‌సీ పేర్కొంది. సమావేశాలను https://www.elivetelecast.com/apercpublichearing వెబ్‌లింకు ద్వారా ప్రత్యక్ష ప్రసారం చేసి వీక్షించే అవకాశం కల్పించింది.