Mohan babu: మోహన్‌బాబు, విష్ణులవి పట్టా భూములే

చంద్రగిరి గ్రామీణ, న్యూస్‌టుడే: సినీ నటుడు మంచు మోహన్‌బాబు, ఆయన కుమారుడు విష్ణు పేరిట దరఖాస్తు పట్టా భూములు ఉన్నట్లు సామాజిక మాధ్యమాల్లో వైరల్‌ అయిన నేపథ్యంలో చంద్రగిరి తహసీల్దార్‌ శిరీష.. వారి రికార్డులు పరిశీలించారు. ఈ సందర్భంగా ఆమె మాట్లాడుతూ.. ‘రెవెన్యూ రికార్డుల మేరకు రామిరెడ్డిపల్లి-68 గ్రామ రెవెన్యూ సర్వే నంబరు 412-1లో 5.29 ఎకరాల భూమికి 1928లో దరఖాస్తు పట్టాలు మంజూరుచేశారు. ఈ భూమిపై 1942 నుంచి 2001 వరకు 11 సార్లు క్రయవిక్రయాలు జరిగాయి. 18.6.1954 కంటే ముందు మంజూరైన దరఖాస్తు పట్టా భూములను నిషేధిత జాబితా నుంచి తొలగించాలని రాష్ట్రప్రభుత్వం 2016లో జీవో 215ను జారీచేసింది. ఈ క్రమంలో మోహన్‌బాబు, విష్ణు పేరిట ఉన్న భూములు డీకేటీ నుంచి పట్టా భూములుగా మారాయి. ఆన్‌లైన్‌లో డీకేటీగా కొనసాగడంతో ఈ సమస్య తలెత్తింది’ అని వివరించారు.