టెలి సేవలకు ఏపీకి తొలి ర్యాంకు

ఈనాడు, అమరావతి: రాష్ట్రంలో వైద్య ఆరోగ్యశాఖ ద్వారా అమలవుతోన్న రెండు పథకాలకు కేంద్రం నుంచి గుర్తింపు లభించింది. టెలి కన్సల్టేషన్‌ ద్వారా వైద్య సేవలందించడంలో ముందున్నందున వైద్య ఆరోగ్య శాఖకు జాతీయ స్థాయిలో తొలి ర్యాంకు లభించినట్లు శనివారం అధికారులు తెలిపారు. ప్రతిరోజూ దాదాపు 1,30,000 మందికి దేశ వ్యాప్తంగా టెలి కన్సల్టేషన్‌ ద్వారా సేవలందుతున్నాయి. ఇందులో రాష్ట్రంలో 60-70 వేల మందికి 27 హబ్స్‌ల్లో ఉన్న వైద్యుల నుంచి టెలి కన్సల్టేషన్‌ ద్వారా సలహాలు, సూచనలు అందుతున్నాయి. రెండో స్థానంలో కర్ణాటక, మూడో స్థానంలో మధ్యప్రదేశ్‌ రాష్ట్రాలు ఉన్నాయి. అలాగే..ఆయుష్మాన్‌ భారత్‌ కింద హెల్త్‌ అండ్‌ వెల్‌నెస్‌ కేంద్రాల నిర్వహణ కింద రాష్ట్రానికి ప్రశంసాపత్రం లభించింది. ఆజాది కా అమృత్‌ మహోత్సవ వేడుకల్లో భాగంగా కేంద్ర ఆరోగ్య కుటుంబ సంక్షేమ శాఖ ప్రత్యేక కార్యక్రమాలు నిర్వహిస్తోంది. ఇందులో భాగంగా రాష్ట్రాల ప్రగతిని గుర్తించారు.