Andhra News: వైద్యులు లాంగ్‌ లీవ్‌ పెడితే కొలువుకు సెలవే

వైద్య ఆరోగ్య శాఖ ముఖ్య కార్యదర్శి కృష్ణబాబు

గుంటూరు వైద్యం, న్యూస్‌టుడే: బోధనాసుపత్రుల్లో వైద్యులు దీర్ఘకాలిక సెలవులో వెళ్తే విధుల నుంచి తొలగిస్తామని వైద్య ఆరోగ్య శాఖ ముఖ్య కార్యదర్శి కృష్ణబాబు స్పష్టం చేశారు. గుంటూరు సర్వజనాసుపత్రిలో బుధవారం వైద్య ఆరోగ్య శాఖ మంత్రి విడదల రజని, ఇతర అధికారులతో కలిసి సమీక్ష సమావేశం నిర్వహించారు. ఈ సందర్భంగా యూరాలజీ విభాగం అధిపతి ఆచార్య ప్రకాశరావు మాట్లాడుతూ తమ విభాగంలో ఉన్న ఇద్దరు సహాయ ఆచార్యులు ఇటీవల విశాఖపట్నం బదిలీ అయ్యారని, అక్కడి నుంచి వచ్చిన ఇద్దరు వైద్యులు విధుల్లో చేరి.. వెంటనే సెలవుపై వెళ్లిపోయారని తెలిపారు. దీనివల్ల తాను ఒక్కడినే రోగులకు సేవలందించడం కష్టంగా మారిందని చెప్పగా కృష్ణబాబు ఈ విధంగా స్పందించారు.