Andhra News: పోతిరెడ్డిపాడు హెడ్‌రెగ్యులేటర్‌లో నక్కిన చిరుత

నందికొట్కూరు, న్యూస్‌టుడే: నంద్యాల జిల్లా జూపాడుబంగ్లా మండలంలోని పోతిరెడ్డిపాడు హెడ్‌రెగ్యులేటర్‌ వద్ద చిరుత సంచారం ప్రజల్ని తీవ్ర ఆందోళనకు గురిచేస్తోంది. నల్లమల్ల అడవికి, పోతిరెడ్డిపాడు హెడ్‌రెగ్యులేటర్‌కి మధ్య కృష్ణానది ఉంది. అడవి నుంచి నీటి కోసం వచ్చిన చిరుత పోతిరెడ్డిపాడు సమీపంలోని రాయలసీమ ఎత్తిపోతల పథకం వద్దకు చేరుకుంది. సోమవారం నిర్మాణంలో ఉన్న భవనం పిల్లర్ల వద్ద పడుకుని ఉండగా కూలీలు గుర్తించారు. ఈ విషయం తెలుసుకున్న అటవీ సిబ్బంది, రెస్క్యూ బృందం, వైద్యులు అక్కడికి చేరుకున్నారు. చిరుతను పట్టుకుని అడవిలో వదిలేందుకు ప్రయత్నించారు. మొదట దాక్కున్న పిల్లరు నుంచి మరో పిల్లరు వద్దకెళ్లి గేటు చాటున నక్కిన చిరుత అక్కడి నుంచి ఎంతకూ కదల్లేదు. రాత్రి వరకు అధికారులు అక్కడే వేచి ఉన్నారు. సమీప గ్రామాల ప్రజలెవరూ రాత్రివేళ ఇంటి నుంచి బయటికి రావద్దని పోలీసులు హెచ్చరించారు.