Andhra News: కర్నూలుకు న్యాయ రాజధాని వచ్చేసింది!: మంత్రి సురేష్‌

ఆగస్టు తర్వాత ఏం జరగనుందో అధికారికంగా చెప్పలేకపోతున్నా

ఈనాడు, కర్నూలు: ‘వైకాపా ప్రణాళికలో కర్నూలు అతి ముఖ్యమైన స్థానంలో ఉంది. కర్నూలుకు న్యాయ రాజధాని వచ్చేసింది. నేను చెప్పకనే చెబుతున్నా. ఆగస్టు తరువాత ఏం జరగబోతుందో. నేను అధికారికంగా చెప్పలేను.. కానీ కచ్చితంగా అభివృద్ధి జరుగుతుంది’ అని పురపాలకశాఖ మంత్రి ఆదిమూలపు సురేష్‌ వ్యాఖ్యానించారు. కర్నూలులో రూ.9 కోట్ల వ్యయంతో చేపట్టనున్న వివిధ అభివృద్ధి పనులకు శంకుస్థాపనలతోపాటు 2, 6 వార్డుల్లో పట్టణ ఆరోగ్య కేంద్రాలను సోమవారం ఆయన ప్రారంభించారు. అనంతరం నూతన కౌన్సిల్‌ హాల్‌లో జరిగిన కార్పొరేటర్ల సమావేశంలో మాట్లాడారు. ఆగస్టు తరువాత కర్నూలుకు మంచి రోజులు రానున్నాయన్నారు. విమానాశ్రయం, సెజ్‌లు, మంచి లేఅవుట్లు కర్నూలుకు వస్తాయని తెలిపారు. రాష్ట్రంలో ఉన్న సుమారు 16వేల లేఅవుట్లను క్రమబద్ధీకరించనున్నామని (రెగ్యులరైజ్‌), విధి విధానాలను త్వరలో చెబుతామని తెలిపారు. పారిశుద్ధ్య కార్మికులకు ప్రాధాన్యమిస్తూ ఓహెచ్‌ఏ (ఆక్యుపేషనల్‌ హెల్త్‌ అలవెన్స్‌) కింద ప్రభుత్వం రూ.6వేలు కచ్చితంగా ఇవ్వాల్సి ఉందని.. ఇందుకు సంబంధించిన దస్త్రాన్ని పరిష్కరించి రూ.70 కోట్ల బకాయిలను చెల్లిస్తామని చెప్పారు