Ponguru Narayana: నారాయణను కోర్టులో హాజరుపరచండి

ఆయన ఎదుటే జామీనుదారులను చూపండి
బెయిలు కేసులో న్యాయమూర్తి ఆదేశాలు
అభ్యంతరం తెలిపిన న్యాయవాదులు..విచారణ నేటికి వాయిదా

చిత్తూరు (న్యాయవిభాగం), న్యూస్‌టుడే: మాజీ మంత్రి నారాయణను కోర్టులో హాజరుపరిచి.. ఆయన ఎదుటే జామీనుదారులను చూపాలని న్యాయమూర్తి ఆదేశించారు. పదోతరగతి ప్రశ్నపత్రం మాల్‌ప్రాక్టీసు కేసులో చిత్తూరు పోలీసులు నారాయణను హైదరాబాద్‌లో అరెస్టుచేసి, ఈనెల పదో తేదీ అర్ధరాత్రి న్యాయమూర్తి సులోచనారాణి ఎదుట హాజరుపరిచిన విషయం తెలిసిందే. ఆయనకు రూ.లక్ష సొంత పూచీకత్తుపై బెయిలు మంజూరుచేసి, రూ.లక్ష చొప్పున ఇద్దరి పూచీకత్తును ఈ నెల 18లోగా కోర్టుకు సమర్పించాలని అప్పట్లో ఆదేశించారు. దీంతో నారాయణ తరఫు న్యాయవాదులు చంద్రశేఖర్‌నాయుడు, రామకృష్ణ, జ్యోతిరామ్‌.. సోమవారం ఇద్దరు జామీనుదారులను స్థానిక నాలుగో అదనపు మేజిస్ట్రేట్‌ కోర్టులో హాజరుపరిచారు. అయితే.. నారాయణను కూడా కోర్టులో హాజరుపరచాలని, ఆయన ఎదుటే జామీనుదారులను చూపించాలని న్యాయమూర్తి శ్రీనివాస్‌ చెప్పగా, దానికి న్యాయవాదులు అభ్యంతరం వ్యక్తం చేస్తూ తమ వాదనలు వినిపించారు. దీంతో కేసు విచారణను మంగళవారానికి వాయిదా వేస్తూ న్యాయమూర్తి ఆదేశాలు జారీచేశారు.