AP News:అమ్మకు... ఎంత కష్టమొచ్చింది..

వృద్ధురాలిని ముళ్ల కంచెలో పడేశారు

ఈనాడు, ఈటీవీ చొరవతో సీహెచ్‌సీకి తరలింపు

కనిగిరి, న్యూస్‌టుడే: ఒళ్లంతా గాయాలు... పట్టుకుంటే వణికిపోతోంది... విపరీతమైన జ్వరం, ఎముకల గూడులా కనిపిస్తున్న ఓ వృద్ధురాలిని ఎవరో కఠినాత్ములు ద్విచక్ర వాహనంపై తీసుకొచ్చి ముళ్ల పొదల్లో పడేసి వెళ్లారు. ఈ సంఘటన శనివారం ప్రకాశం జిల్లా కనిగిరి పట్టణంలోని మినీ క్రీడా స్టేడియం సమీపంలో చోటు చేసుకుంది. ఇక అమ్మతో పని లేదు అనుకున్నారో.. ఆ వృద్ధురాలికి ఓ ముద్ద ఎందుకు దండగ అని భావించారో ఏమో. అలా వదిలేసి వెళ్లారు. అటుగా వెళుతున్న విద్యార్థులు గమనించి ‘ఈనాడు-ఈటీవీ’కి సమాచారం అందించారు. అక్కడి చేరుకున్న ‘న్యూస్‌టుడే’ ప్రతినిధి స్నేహహస్తం ప్రతినిధులకు సమాచారం ఇచ్చారు. వారు వచ్చి ఆమెకు సపర్యలు చేసి 108లో సీహెచ్‌సీకి తరలించారు. ఆసుపత్రిలో స్పృహలోకి వచ్చిన ఆ వృద్ధురాలిని పేరు అడగ్గా తన పేరు సాబీరా అని, తనకు కుమారుడు ఉన్నాడని వెల్లడించారు. ఎవరు నిన్ను ముళ్లపొదల్లో పడేశారన్న ప్రశ్నకు మాత్రం ఆమె మౌనం వహించారు. ఆమె ఆరోగ్యం కుదట పడ్డాక ఒంగోలుకు తరలిస్తామని తహసీల్దారు ఉయ్యాల పుల్లారావు తెలిపారు.