Updated : 20 Nov 2021 08:20 IST

AP High Court: ప్రత్యేక హోదా ఎందుకు ఇవ్వట్లేదో చెప్పండి

వివరాలతో కౌంటరు వేయండి

కేంద్రానికి హైకోర్టు ఆదేశం

ఈనాడు, అమరావతి: ఆంధ్రప్రదేశ్‌కు ప్రత్యేక హోదా ఇవ్వకపోవడానికి కారణాలేంటో చెప్పాలని కేంద్ర ప్రభుత్వాన్ని హైకోర్టు శుక్రవారం ఆదేశించింది. ఇతర రాష్ట్రాలకు ఇచ్చినప్పుడు.. ఏపీకి ఎందుకు  ఇవ్వట్లేదో తెలపాలంది. పూర్తి వివరాలతో కౌంటరు వేయాలని ఆదేశించింది. రాష్ట్ర ప్రభుత్వం సైతం  వివరాలు సమర్పించాలంది. విచారణను డిసెంబరు 20కి వాయిదా వేసింది. హైకోర్టు న్యాయమూర్తులు జస్టిస్‌ అసనుద్దీన్‌ అమానుల్లా, జస్టిస్‌ బి.కృష్ణమోహన్‌తో కూడిన ధర్మాసనం ఈ మేరకు ఆదేశాలిచ్చింది. పార్లమెంటు సాక్షిగా ఏపీకి ప్రత్యేక హోదా ఇస్తామని చెప్పి... ఆ హామీని అమలు చేయట్లేదంటూ అమలాపురానికి చెందిన న్యాయవాది వి.రమేశ్‌చంద్ర వర్మ హైకోర్టులో పిల్‌ వేశారు. న్యాయవాది ఎం.రామారావు వాదనలు వినిపిస్తూ.. ఏపీని ఆదుకునేందుకు అప్పటి ప్రధాని పార్లమెంటులో ప్రత్యేక హోదా ఇస్తామని హామీ ఇచ్చారన్నారు. ఈశాన్య, హిమాలయ రాష్ట్రాలకు హోదా ఇచ్చిన కేంద్రం.. ఆంధ్రప్రదేశ్‌ విషయంలో హామీని నిలబెట్టుకోలేదన్నారు. ధర్మాసనం స్పందిస్తూ.. పలు రాష్ట్రాలకు ఇచ్చినప్పుడు ఏపీ విషయంలో ఎందుకు ఇవ్వట్లేదని కేంద్రాన్ని ప్రశ్నించింది. విభజనతో ఏపీ నష్టపోయిందని పేర్కొంది. ఈ నేపథ్యంలో ప్రత్యేక హోదా ఇవ్వాల్సి ఉంటుందని వ్యాఖ్యానించింది. కేంద్ర ప్రభుత్వం తరఫున ఏఎస్‌జీ హరినాథ్‌ వాదనలు వినిపిస్తూ.. ఈ వ్యవహారంలో సుప్రీంకోర్టులో వ్యాజ్యాలు పెండింగ్‌లో ఉన్నాయన్నారు. ప్రత్యేక హోదా పొందిన రాష్ట్రాలకు, ఆంధ్రప్రదేశ్‌కు భౌగోళిక పరిస్థితుల విషయంలో తేడా ఉందన్నారు. ఆ వాదనలను విన్న ధర్మాసనం.. కౌంటరు వేయాలని ఆదేశించింది.

Read latest Ap top news News and Telugu News

 Follow us on Facebook, Twitter, Instagram, Koo, ShareChat and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts