Union Budget 2022: విభజన చట్టంలో హామీల ప్రస్తావన లేకపోవడం బాధాకరం

కేంద్ర బడ్జెట్‌పై రాష్ట్ర ఆర్థిక శాఖ మంత్రి బుగ్గన

ఈనాడు-అమరావతి: కేంద్ర ఆర్థిక మంత్రి ప్రవేశపెట్టిన బడ్జెట్‌ పలు అంశాల్లో ప్రోత్సాహకరంగా ఉందని పేర్కొంటూనే...రాష్ట్ర విభజన చట్టంలో ఏపీకి ఇచ్చిన హామీల ప్రస్తావన లేకపోవడం నిరాశ కలిగించిందని ఏపీ ఆర్థిక శాఖ మంత్రి బుగ్గన రాజేంద్రనాథ్‌రెడ్డి అన్నారు. ప్రత్యేక హోదా, పోలవరం జాతీయ ప్రాజెక్టు, మౌలిక వసతులు, పరిశ్రమలు, కేంద్ర ప్రభుత్వ సంస్థలు తదితరాలను  ప్రస్తావించకపోవడం రాష్ట్రానికి నిరాశ కలిగించిందని ఆయన మంగళవారం ఒక ప్రకటనలో పేర్కొన్నారు. ‘మౌలిక వసతుల అభివృద్ధిలో రాష్ట్రాల పాత్ర చాలా కీలకం. వనరుల లభ్యత తక్కువగా ఉండటం, రుణాలు తీసుకోవడంపై ఉండే పరిమితుల వల్ల రాష్ట్రాలు ఇబ్బంది పడుతున్నాయి.  కేటాయింపులు పెంచడం, రుణ పరిమితి పెంచేందుకు చర్యలు చేపట్టి ఉంటే రాష్ట్రాలకు మరింత ప్రోత్సాహకరంగా ఉండేది. నరేగా, ఎరువులు, ఆహార రాయితీలు బాగా తగ్గాయి. జల జీవన్‌ మిషన్‌, జాతీయ విద్య మిషన్‌, జాతీయ ఆరోగ్య మిషన్‌కు కేటాయింపులు పెంచారు. ప్రస్తుత కొవిడ్‌ పరిస్థితులను దృష్టిలో ఉంచుకొని జాతీయ ఆరోగ్య మిషన్‌కు కేటాయింపులు మరింత పెంచి ఉంటే బాగుండేది. జాతీయ రహదారులకు కేటాయింపులు రెట్టింపు చేయడం ముదావహం. రాష్ట్రాల్లో మూల ధన వ్యయంగా వెచ్చించేందుకు రాష్ట్రాలకు కేంద్ర సాయంగా ఇచ్చే కేటాయింపులను రూ.లక్ష కోట్లకు పెంచడం ఆనందదాయకం...’ అని మంత్రి బుగ్గన పేర్కొన్నారు. ‘జీడీపీ పెరగడం మంచి పరిణామం. ద్రవ్యలోటు, రెవెన్యూలోటు తగ్గడం సంతోషదాయకం. కేంద్ర ప్రభుత్వ స్థూల పన్ను రాబడికి జీఎస్‌టీ బాగా తోడ్పడింది. రహదారులు, రైల్వేలు, విమానాశ్రయాలు, ఓడరేవులు, జలమార్గాలు, సరకు రవాణా, మౌలిక సదుపాయాల రంగాలు ప్రపంచ స్థాయిలో అభివృద్ధి చెందేలా జాతీయ మాస్టర్‌ ప్లాన్‌ రూపొందించారు...’ అని మంత్రి బుగ్గన పేర్కొన్నారు.