Updated : 28 Feb 2022 05:51 IST

Ukraine Crisis: ఉక్రెయిన్‌కు అండగా ఆయుధాలు, ఇంధనం

రూ.2,628 కోట్ల సాయానికి బైడెన్‌ ఆమోదం
జర్మనీ, బెల్జియం, ఫ్రాన్స్‌ తదితర దేశాల అభయం

వాషింగ్టన్‌: రష్యా దాడులతో ఉక్కిరిబిక్కిరవుతున్న ఉక్రెయిన్‌కు క్రమంగా ఒక్కో దేశం ముందుకు వచ్చి మిలటరీ సాయంతో అండగా నిలుస్తున్నాయి. అమెరికా అధ్యక్షుడు జో బైడెన్‌ దేశ ఆయుధాగారం నుంచి రూ.2,628 కోట్ల (350 మిలియన్‌ డాలర్లు) విలువచేసే ఆయుధాలను అదనపు సాయంగా ఉక్రెయిన్‌కు పంపాల్సిందిగా ఆదేశాలు జారీ చేశారు. విదేశీ సహాయక చట్టం కింద ఈ నిర్ణయం తీసుకొన్నట్లు తెలుపుతూ విదేశాంగ మంత్రి ఆంటోని బ్లింకెన్‌కు మార్గదర్శకాలు పంపారు. ఈ ఆయుధ రవాణాను ఓ అపూర్వమైన సందర్భంగా బైడెన్‌ అభివర్ణించారు. రష్యా యుద్ధ విమానాలను కూల్చడానికి జావెలిన్‌ యాంటీ-ట్యాంక్‌ ఆయుధాలు, స్టింగర్‌ క్షిపణులను ఉక్రెయిన్‌ అడుగుతోంది. ఆయుధ నిరోధక కవచాలు, విమాన నిరోధక వ్యవస్థల వంటి ఆయుధాలను సాయంగా పంపుతున్నట్లు అమెరికా రక్షణ విభాగ కార్యాలయం ‘పెంటగాన్‌’ తెలిపింది.

మరిన్ని దేశాల సాయం

ఉక్రెయిన్‌కు ట్యాంకు విధ్వంసక ఆయుధాలను చేరవేసేందుకు సమ్మతిస్తూ జర్మనీ ప్రభుత్వం కీలక నిర్ణయం తీసుకుంది. వెయ్యి ట్యాంకు విధ్వంసక ఆయుధాలు, ఉపరితలం నుంచి గగన తలానికి ప్రయోగించే ‘స్టింగర్‌’ క్షిపణులు 500 పంపేందుకు నిర్ణయించింది.

* ఉక్రెయిన్‌కు 3,800 టన్నుల ఇంధనం, 2,000 మెషీన్‌ గన్లను పంపాలని బెల్జియం నిర్ణయం తీసుకొంది. నాటో ప్రయత్నాల్లో భాగంగా ఈ దేశం ఇప్పటికే 300 ట్రూపుల సైన్యాలను ఉక్రెయిన్‌ సరిహద్దులోని రొమేనియాకు పంపింది. డచ్‌ నుంచి 50 ట్యాంకు విధ్వంసక ఆయుధాలు, 400 రాకెట్లు పంపుతున్నట్లు ఆ దేశ పార్లమెంటుకు ప్రభుత్వం నివేదించింది. నెదర్లాండ్స్‌ నుంచి 200 గగనతల రక్షణ రాకెట్లు పంపుతున్నారు. రూ.64 కోట్ల విలువైన (8.57 మిలియన్‌ డాలర్లు) ఆయుధాలు, మందుగుండు పంపుతున్నట్లు చెక్‌ ప్రభుత్వ రక్షణ మంత్రి ప్రకటించారు. రూ.93 కోట్ల (12.39 మిలియన్‌ డాలర్లు) విలువ చేసే ఫిరంగి మందుగుండు సామగ్రి, ఇంధనం ఉక్రెయిన్‌కు పంపనున్నట్లు స్లొవేకియా రక్షణమంత్రి తెలిపారు. తాము కూడా ఆయుధాలు పంపే విషయాన్ని పరిశీలిస్తున్నట్లు ఫ్రాన్స్‌ ఆర్మీ అధికార ప్రతినిధి సైతం వెల్లడించారు. ఉక్రెయిన్‌ విజ్ఞప్తి మేరకు ఆయుధాలు, మందుగుండు సామగ్రి పంపుతున్న గ్రీస్‌ ప్రకటించింది.

ఇంటర్నెట్‌ సేవలతో ఎలాన్‌ మస్క్‌ బాసట.. 

బిలియనీర్‌ ఎలాన్‌ మస్క్‌ సైతం ఉక్రెయిన్‌కు బాసటగా నిలిచారు. స్టార్‌లింక్‌ శాటిలైట్‌ బ్రాడ్‌బ్యాండ్‌ సేవల్ని ప్రారంభించి నిరంతరాయ ఇంటర్నెట్‌ సేవలను ఉక్రెయిన్‌ ప్రజలకు అందుబాటులోకి తీసుకొచ్చారు. మరిన్ని టెర్మినళ్లను సైతం ప్రారంభిస్తామని హామీ ఇచ్చారు.

Read latest Ap top news News and Telugu News

 Follow us on Facebook, Twitter, Instagram, Koo, ShareChat and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts