AP Cabinet: ముద్దాడారు.. మోకరిల్లారు

పాదాభివందనాలతో ప్రభుభక్తి చాటుకున్న మంత్రులు

ఈనాడు, అమరావతి: మంత్రి పదవి ఇచ్చినందుకు కొందరు.. మంత్రివర్గంలో మళ్లీ చోటిచ్చినందుకు మరికొందరు ప్రమాణస్వీకార వేదికపై ముఖ్యమంత్రి జగన్‌కు పాదాభివందనం చేసి ప్రభుభక్తిని చాటుకున్నారు. చిన్నాపెద్దా అన్న తేడా లేకుండా, వయసు తారతమ్యాలు పట్టించుకోకుండా ముఖ్యమంత్రి కాళ్లకు నమస్కరించారు. మంత్రులుగా ప్రమాణస్వీకారం చేసినవారు ముఖ్యమంత్రి, గవర్నర్ల వద్దకు వెళ్లి నమస్కరిస్తుంటారు. కరచాలనం చేస్తుంటారు. కానీ సోమవారం కొత్త మంత్రివర్గం ప్రమాణస్వీకారం సందర్భంగా కొందరు మంత్రులు ముఖ్యమంత్రికి పాదాభివందనం చేయగా, ముఖ్యమంత్రి వారిని ఆశీర్వదించారు. జగన్‌కంటే వయసులో చాలా పెద్దవారైన నారాయణస్వామి, బూడి ముత్యాలనాయుడు వంటివారూ ఆయన పాదాలకు నమస్కరించడం విశేషం. కొందరు కాళ్లకు నమస్కరించకపోయినా సగానికిపైగా వంగి దాదాపు ముఖ్యమంత్రి కాళ్లను తాకినంత పనిచేశారు. జగన్‌కు పాదాభివందనం చేసిన వారిలో బూడి ముత్యాలనాయుడు, నారాయణస్వామితోపాటు గుడివాడ అమర్‌నాథ్‌, జోగి రమేష్‌, ఉషశ్రీచరణ్‌, మేరుగ నాగార్జున, ఆర్‌.కె.రోజా, సీదిరి అప్పలరాజు, తానేటి వనిత, విడదల రజని ఉన్నారు. వారిలో కొందరు మోకాళ్లపై కూర్చుని జగన్‌ పాదాల్ని తాకి మరీ ఆశీర్వచనాలు తీసుకున్నారు. జగన్‌కు రోజా పాదాభివందనం చేసి ఆయన చేతిని ముద్దాడి కృతజ్ఞతలు తెలిపారు. కారుమూరి నాగేశ్వరరావు ఆయన కాళ్లకు నమస్కరించినంత పనిచేశారు. వేణుగోపాలకృష్ణ, గుమ్మనూరు జయరాం, కొట్టు సత్యనారాయణ, కాకాణి గోవర్ధన్‌రెడ్డి, పినిపే విశ్వరూప్‌, రాజన్నదొర బాగా వంగి జగన్‌కు నమస్కరించారు. ప్రమాణస్వీకారం చేసిన మంత్రులంతా మొదట ముఖ్యమంత్రి దగ్గరకు వెళ్లి నమస్కరించగా.. ఒక్క బొత్స సత్యనారాయణ మాత్రం మొదట గవర్నర్‌ వద్దకు వెళ్లి నమస్కరించి తరువాత ముఖ్యమంత్రి వద్దకు వచ్చి కరచాలనం చేశారు. పెద్దిరెడ్డి రామచంద్రారెడ్డి, ధర్మాన ప్రసాదరావువంటి సీనియర్లు ముఖ్యమంత్రికి నమస్కరించి కరచాలనం చేశారు.