Y S Kondareddy: వైఎస్‌ కొండారెడ్డి జిల్లా బహిష్కరణ!

కలెక్టరుకు ప్రతిపాదనలు పంపిన ఎస్పీ

ఈనాడు డిజిటల్‌, కడప: వైయస్‌ఆర్‌ జిల్లా చక్రాయపేట మండల వైకాపా ఇన్‌ఛార్జి వైఎస్‌ కొండారెడ్డిని జిల్లా నుంచి బహిష్కరించాలనే ప్రతిపాదనలను కలెక్టర్‌ విజయరామరాజుకు పంపినట్లు ఎస్పీ అన్బురాజన్‌ తెలిపారు. ముఖ్యమంత్రి జగన్‌ ఆదేశాల మేరకు ఈ చర్యలు తీసుకున్నట్లు వివరించారు. పులివెందుల నియోజకవర్గంలో చక్రాయపేట మండలం మీదుగా వెళ్లే జాతీయ రహదారి నిర్మాణ పనులు చేస్తున్న గుత్తేదారును బెదిరించిన కేసులో రెండు రోజుల కిందట కొండారెడ్డి అరెస్టయ్యారు. ఆయనను లక్కిరెడ్డిపల్లె కోర్డులో హాజరుపరచగా జడ్జి ఈ నెల 20వ తేదీ వరకు రిమాండు విధించారు. బెయిలు పిటిషన్‌ దాఖలు చేేయగా విచారించిన కోర్టు.. బుధవారం బెయిలు మంజూరు చేసింది. ఆయన విడుదల కాగానే జిల్లా బహిష్కరణ ప్రతిపాదన ప్రకటన వెలువడింది. దీనిపై గురువారం ఓ నిర్ణయం తీసుకునే అవకాశం ఉంది. కొండారెడ్డిపై ఎస్‌ఆర్‌కే కన్‌స్ట్రక్షన్స్‌ కంపెనీ ఉద్యోగులను బెదిరించిన కేసుతోపాటు పలు కేసులున్నాయని ఎస్పీ తెలిపారు. బెయిలుపై విడుదలైన కొండారెడ్డి కడప నగరానికి చేరుకున్నారు.