అవినీతికి పాల్పడిన వీవోఏలపై కేసులు: ఉపముఖ్యమంత్రి

ఈనాడు డిజిటల్‌, అమరావతి: డ్వాక్రా సంఘాలకు సంబంధించిన పొదుపు, రుణాల మంజూరులో అక్రమాలు జరిగిన ప్రాంతాల్లోని వీవోఏలు, సీసీలు, ఇతర అధికారులపై క్రిమినల్‌ కేసులు పెట్టాలని అధికారులను ఉప ముఖ్యమంత్రి బూడి ముత్యాలనాయుడు ఆదేశించారు. గతంలో అవినీతికి పాల్పడిన వారిపైనా చర్యలు తీసుకోవాలని సూచించారు. పింఛన్ల మంజూరుకు జారీ చేసిన ఆరోగ్య ధ్రువీకరణ పత్రాలను మండల స్థాయి కమిటీతో తనిఖీ చేయిస్తామని వెల్లడించారు. అక్రమంగా ధ్రువీకరణ పత్రాలు ఇచ్చిన వైద్యులపై చర్యలు తీసుకుంటామని చెప్పారు. సచివాలయంలో ఆయన గ్రామీణ పేదరిక నిర్మూలన సొసైటీపై (సెర్ప్‌) గురువారం సమీక్ష నిర్వహించారు. ఈ సందర్భంగా మాట్లాడుతూ.. ‘వీవోఏల నియామక నిబంధనల్లో మార్పులు చేయాలి. ఇకపై మహిళలనే వీవోఏలుగా ఎంపిక చేయాలి. 18-45 ఏళ్ల మధ్య వయసు కలిగిన స్థానికులకే అవకాశం కల్పించాలి’ అని ఆదేశించారు.