పంటల బీమాపై వైకాపా కార్యకర్తల్లో అసంతృప్తి

పులివెందుల పార్టీ ప్లీనరీలో బహిర్గతం

పులివెందుల, వేంపల్లె, న్యూస్‌టుడే: వైయస్‌ఆర్‌ జిల్లా పులివెందులలో జరిగిన వైకాపా ప్లీనరీలో పంటల బీమాపై కొందరు కార్యకర్తలు అసంతృప్తి వ్యక్తంచేశారు. ఎంపీ వైఎస్‌ అవినాష్‌రెడ్డి నేతృత్వంలో పులివెందులలోని సీఎం క్యాంపు కార్యాలయ సమీపంలోని వైయస్‌ఆర్‌ ఆడిటోరియంలో గురువారం కార్యకర్తల సమావేశం జరిగింది. ప్రభుత్వంలో తమ పాత్ర ఏమీ లేదని, అంతా వాలంటీర్లే నడుపుతున్నారని వివిధ మండలాల్లోని కార్యకర్తలు అసంతృప్తి వ్యక్తం చేశారు. ఇలాగే కొనసాగితే పార్టీకి ఇబ్బందులు తలెత్తుతాయని వాపోయారు. రాష్ట్రమంతటా కార్యకర్తల్లో అసంతృప్తి ఉందని, ఈ విషయాన్ని సీఎం దృష్టికి తీసుకెళ్లాలని కార్యకర్తలు ఎంపీకి విన్నవించారు. ఈ-క్రాప్‌ నమోదులో లోపాలతో చాలా మంది రైతులకు వైఎస్సార్‌ ఉచిత బీమా అందడం లేదని చెప్పారు. అరటి, ఉల్లి, మామిడి తోటలకు పరిహారం అందకపోవడంతో రైతుల్లో అసంతృప్తి నెలకొందని వివరించారు. వీటన్నింటిపై ఎంపీ కార్యకర్తల్లో భరోసా నింపేలా మాట్లాడారు. సీఎం దృష్టికి తీసుకెళతానని హామీనిచ్చారు.