ప్రవేశ పరీక్ష పెట్టి.. కౌన్సెలింగ్‌ రద్దు

ఎల్పీసెట్‌ అభ్యర్థుల్లో ఆందోళన

ఈనాడు, అమరావతి: భాషా పండితుల కౌన్సెలింగ్‌ను రద్దు చేయాలని పాఠశాల విద్యాశాఖ నిర్ణయించింది. ఉపాధ్యాయ నియామకాల్లో భాషా పండితుల పోస్టులు లేనందున ఈ కోర్సు కొనసాగించాల్సిన అవసరం లేదని పేర్కొంది. ఇప్పుడు ఉన్నత పాఠశాలల్లో స్కూల్‌ అసిస్టెంట్‌ లాంగ్వేజ్‌ పోస్టులు మాత్రమే ఉన్నందున భవిష్యత్తులో ప్రవేశ పరీక్ష సైతం నిర్వహించరాదని నిర్ణయించింది. ప్రవేశ పరీక్ష నిర్వహించి, కౌన్సెలింగ్‌ నిర్వహించాల్సిన సమయంలో ఈ నిర్ణయం తీసుకోవడంతో అభ్యర్థులు ఆందోళనకు గురవుతున్నారు. గతేడాది సెప్టెంబరు 25న ఎల్పీసెట్‌-2021ను నిర్వహించారు. ఈ ప్రవేశ పరీక్షకు 2,086మంది హాజరయ్యారు. తెలుగు శిక్షణకు 705, హిందికి 1,381మంది పరీక్ష రాశారు. అక్టోబరులో ఫలితాలు విడుదల చేశారు. తెలుగు భాషకు సంబంధించి 691మంది అర్హత సాధించారు.