పూర్తి వివరాలతో కౌంటర్‌ వేయండి

అనిశాకు హైకోర్టు నోటీసులు

ఐపీఎస్‌ ఏబీ వెంకటేశ్వరరావు వ్యాజ్యంపై విచారణ

ఈనాడు, అమరావతి: నిఘా విభాగాధిపతిగా పనిచేసిన సమయంలో భద్రతా పరికరాల కొనుగోలు వ్యవహారంలో అనిశా తనపై నమోదు చేసిన కేసును కొట్టివేయాలంటూ సీనియర్‌ ఐపీఎస్‌ అధికారి ఏబీ వెంకటేశ్వరరావు దాఖలు చేసిన వ్యాజ్యంపై హైకోర్టు స్పందించింది. పూర్తి వివరాలతో రెండు వారాల్లో కౌంటర్‌ దాఖలు చేయాలని అనిశాకు నోటీసులిచ్చింది. విచారణను ఈనెల 19కి వాయిదా వేసింది. హైకోర్టు న్యాయమూర్తి జస్టిస్‌ ఎన్‌.జయసూర్య మంగళవారం ఈ మేరకు ఆదేశాలిచ్చారు. నాలుగు వారాలు సమయం కావాలని అనిశా చేసిన అభ్యర్థనను న్యాయమూర్తి తోసిపుచ్చారు. దురుద్దేశంతో తనపై కేసు నమోదు చేశారంటూ ఏబీ వెంకటేశ్వరరావు హైకోర్టును ఆశ్రయించిన విషయం తెలిసిందే.