ఉన్నతీకరించిన బడుల్లో ఉత్తుత్తి కళాశాలలు!

అధ్యాపకులు, ప్రయోగ శాలలు లేకుండానే ఏర్పాటు

ఈనాడు, అమరావతి: అధ్యాపకులు, భవనాలు, ప్రయోగశాలలు లేకుండానే విద్యాశాఖ 292 మండలాల్లో బాలికల జూనియర్‌ కళాశాలలను ప్రారంభిస్తోంది. ఉన్నత పాఠశాలల్లోనే వీటిని ఏర్పాటు చేసి అక్కడి స్కూల్‌ అసిస్టెంట్లతోనే పాఠాలు చెప్పించాలని సూచించింది. ప్రయోగ శాలలు లేకపోతే సమీపంలోని ఆదర్శ పాఠశాలలు, ప్రభుత్వ జూనియర్‌ కళాశాలల్లోని వాటిని వినియోగించుకోవాలని పేర్కొంది. ఇప్పటికే 331 కస్తూర్బాగాంధీ బాలికా విద్యాలయాలను ఇంటర్మీడియట్‌కు ఉన్నతీకరించారు. ఇవికాకుండా మండలానికి రెండు జూనియర్‌ కళాశాలలున్న 13చోట్ల అమ్మాయిల కోసం ప్రత్యేకంగా ఏర్పాటు చేశారు. వీటిలో ఎంపీసీ, బైపీసీ, సీఈసీ కోర్సులు ఉంటాయి. ప్రాథమికంగా ఎంపీసీ, బైపీసీ గ్రూపుల్లోనే ప్రవేశాలు నిర్వహిస్తారు. ఉన్నతీకరించిన బడుల్లో పదోతరగతి ఉత్తీర్ణులైన విద్యార్థినులకు అందులో ఏర్పాటైన కళాశాలల్లోనే  ప్రవేశాలు కల్పిస్తారు.