పుణె ల్యాబ్‌కు మంకీపాక్స్‌ అనుమానితుడి నమూనాలు

విశాఖపట్నం(వన్‌టౌన్‌), న్యూస్‌టుడే: విశాఖలోని ఓ ప్రైవేటు వైద్యకళాశాల ఆసుపత్రిలో మంకీపాక్స్‌ అనుమానిత లక్షణాలతో బాధపడుతున్న వైద్య విద్యార్థి నుంచి సేకరించిన నమూనాలను పుణెలోని జాతీయ వైరాలజీ ల్యాబ్‌కు పంపారు. ఆంధ్ర వైద్య కళాశాల వైద్యుల బృందం శనివారం అనుమానితుని నుంచి నమూనాలను సేకరించి తదుపరి పరీక్షలకు పంపినట్లు జిల్లా వైద్య ఆరోగ్యశాఖ అధికారిణి డాక్టర్‌ విజయలక్ష్మి తెలిపారు. బాధితుని శరీరంపై ఉన్న మచ్చలు నల్లబారాయని, మంకీపాక్స్‌ కాకపోవచ్చని వైద్య నిపుణులు అభిప్రాయపడుతున్నారని చెప్పారు. అయినా ముందుజాగ్రత్తగా నమూనాలను పుణెలోని ఎన్‌ఐవీ కేంద్రానికి పంపినట్లు వివరించారు. బాధితుడిని ఐసొలేషన్‌లో ఉంచారు.