పదవీవిరమణ ప్రయోజనాలకు ఆందోళన చేస్తాం

ఎస్టీయూ హెచ్చరిక

ఈనాడు, అమరావతి: పదవీ విరమణ పొందిన ఉద్యోగుల ఆర్థిక ప్రయోజనాలను వెంటనే చెల్లించకపోతే సీఎఫ్‌ఎంఎస్‌ కార్యాలయాన్ని ముట్టడిస్తామని రాష్ట్రోపాధ్యాయ సంఘం(ఎస్టీయూ) అధ్యక్ష, ప్రధాన కార్యదర్శులు ఎల్‌.సాయి శ్రీనివాస్‌, హెచ్‌. తిమ్మన్న ప్రకటించారు. రాష్ట్ర ప్రభుత్వ విధానాల కారణంగా 13లక్షల మంది ఉద్యోగ, ఉపాధ్యాయ, కార్మిక, పెన్షనర్లు ఆర్థిక ఇబ్బందులు పడుతున్నారని వెల్లడించారు. పదవీవిరమణ చేసి వారికి సకాలంలో ఆర్థిక ప్రయోజనాలను చెల్లించకపోవడాన్ని నిరసిస్తూ రాష్ట్ర వ్యాప్తంగా జిల్లా ఖజానా కార్యాలయాల ఎదుట ఉపాధ్యాయులు బుధవారం నిరసనలు నిర్వహించారు. అన్నమయ్య జిల్లాలో ఎమ్మెల్సీ కత్తి నరసింహారెడ్డి, భీమవరంలో ఎస్టీయూ అధ్యక్షుడు శ్రీనివాస్‌, కర్నూలులో ప్రధాన కార్యదర్శి తిమన్న పాల్గొన్నారు. అయా నిరసనల్లో వారు మాట్లాడుతూ.. పదవీ విరమణ పొందిన ఉద్యోగులకు రావాల్సిన ప్రయోజనాలను చెల్లించడం లేదు. దీంతో ఉపాధ్యాయులు ఆర్థికంగా సతమతమవుతున్నారు. వైద్య బిల్లుల చెల్లింపులు ఏడాది కాలంగా పెండింగ్‌లోనే ఉన్నాయి. డీఏ బకాయిలు చెల్లించడం లేదు. పురపాలక ఉపాధ్యాయులకు బదిలీలు, పదోన్నతుల షెడ్యూల్‌ విడుదల చేయాలి. పాఠశాలల విలీన ప్రక్రియను నిలిపివేయాలి. ఉపాధ్యాయుల హేతుబద్దీకరణ ఉత్తర్వులను రద్దు చేయాలి’ అని డిమాండ్‌ చేశారు.