63 మంది ఖైదీల విడుదల

రాజమహేంద్రవరం నేరవార్తలు, న్యూస్‌టుడే: స్వాతంత్య్ర దినోత్సవం సందర్భంగా సత్ప్రవర్తన గల 63 మంది ఖైదీలను సోమవారం తూర్పుగోదావరి జిల్లా రాజమహేంద్రవరం కేంద్ర కారాగారం నుంచి జైలు అధికారులు విడుదల చేశారు. వీరిలో జీవితఖైదు అనుభవిస్తున్న 48 మంది పురుషులు, 8 మంది మహిళలు ఉన్నారు.

అపరాధ రుసుము చెల్లించలేక..

విశాలాక్షినగర్‌ (విశాఖ), న్యూస్‌టుడే: విశాఖ కేంద్ర కారాగారం నుంచి 40 మంది పురుషులు, ఇద్దరు మహిళల విడుదలకు అనుమతి లభించింది. వీరిలో హత్య కేసులో జీవితఖైదు అనుభవిస్తున్న ఓ మహిళ రూ.60 వేల జరిమానా చెల్లించాల్సి ఉంది. ఈ మొత్తం కట్టకపోతే మరో ఆరు నెలలు అదనంగా జైలుశిక్ష అనుభవించాలని అప్పట్లో కోర్టు తీర్పునిచ్చింది. సత్ప్రవర్తన కారణంగా ఆమె విడుదలకు తాజాగా అవకాశం వచ్చినా, జరిమానా చెల్లించనందున బయటకు రాలేకపోయింది. దీంతో సోమవారం 41 మందే విడుదలయ్యారు.