కుళాయిల నుంచి పురుగు మందు కలిపిన నీరు

ఉయ్యాలవాడ, న్యూస్‌టుడే: పంటలకు వాడే పురుగు నివారణ మందు కలిపిన నీరు కుళాయిల నుంచి రావడంతో కాలనీవాసులు ఆందోళనకు గురయ్యారు. నంద్యాల జిల్లా ఉయ్యాలవాడ మండలం కొండుపల్లె గ్రామ  కాలనీలో మంగళవారం ఉదయం కుళాయిల నుంచి పురుగుల మందు కలిసిన నీరు సరఫరా అయ్యింది. శివమ్మ అనే వృద్ధురాలు నీటి వాసనను గుర్తించి మిగతా వారిని అప్రమత్తం చేశారు. రెడ్డిచర్ల రాజు, సిద్దిరెడ్డి రామచంద్రారెడ్డి, తోట రాముడు, తోట మధు, ఉప్పరి లక్ష్మీదేవి, హైదర్‌ వలీ ఇళ్ల కుళాయిల్లో మాత్రమే ఈ నీరు రావడంతో అనుమానాలకు దారి తీసింది.  వారిళ్లలోకి వచ్చిన నీటిని పరిశీలించి.. వెంటనే పోలీసులకు ఫిర్యాదు చేశారు. ఎంపీడీవో ఉమామహేశ్వరరావు, ఈవోపీఆర్డీ వెంకటేశ్వరరావు, పోలీసులు వచ్చి నీటిని పరిశీలించారు. ఎక్కడ లోపం జరిగిందో తెలుసుకునేందుకు పైపులైన్లు పరిశీలిస్తున్నారు.