Updated : 23 Sep 2022 10:39 IST

అమరావతిపై ‘మాస్టర్‌ప్లాన్‌’

బృహత్‌ప్రణాళిక మార్చొద్దని విస్పష్టంగా చెప్పిన హైకోర్టు

అయినా ఏకంగా సీఆర్‌డీఏ చట్టానికే ప్రభుత్వ సవరణ

అసెంబ్లీ చివరిరోజు ఆమోదం

దీంతో ప్రభుత్వానికి పలు అధికారాలు

స్థానిక సంస్థల సమ్మతి లేకపోయినా మాస్టర్‌ప్లాన్‌ మార్చేయొచ్చు

ప్రజాభిప్రాయం ఇక నామమాత్రమే

అమరావతిని నాశనం చేయడానికి ప్రభుత్వం కొత్త ఎత్తుగడ

ఈనాడు, అమరావతి: అమరావతి విధ్వంసమే ఎజెండాగా సాగుతున్న జగన్‌ ప్రభుత్వం... దాని అమలుకు సరికొత్త దారులు వెతుకుతోంది. అమరావతి బృహత్‌ ప్రణాళిక (మాస్టర్‌ప్లాన్‌)లో ఇష్టానుసారం మార్పులు చేయడానికి వీల్లేదని హైకోర్టు విస్పష్టంగా చెప్పడంతో ఏకంగా సీఆర్‌డీఏ చట్టాన్నే సవరిస్తూ బుధవారం శాసనసభలోనూ, మండలిలోనూ బిల్లు ఆమోదించింది. ఏ ప్రభుత్వమైనా ఒక సదుద్దేశంతో చట్టాల్ని సవరిస్తుంది. కానీ వైకాపా ప్రభుత్వం మాత్రం అమరావతిని దెబ్బతీయడమే లక్ష్యంగా సీఆర్‌డీఏ చట్టాన్ని సవరించిందని రాజధాని ప్రజలు ఆందోళన వ్యక్తం చేస్తున్నారు. అమరావతినే ఏకైక రాజధానిగా కొనసాగించాలని, ఆరు నెలల్లో నిర్మాణం పూర్తి చేయాలని హైకోర్టు స్పష్టంగా తీర్పు చెప్పినా.. చీమకుట్టినట్టయినా లేని జగన్‌ ప్రభుత్వం ఇప్పుడు సీఆర్‌డీఏ చట్టాన్ని సవరించాల్సిన అవసరం ఏమొచ్చిందని వారు ప్రశ్నిస్తున్నారు. అమరావతి మాస్టర్‌ప్లాన్‌ను ఛిన్నాభిన్నం చేసే కుట్రలో భాగంగానే సీఆర్‌డీఏ చట్టాన్ని సవరించారని మండిపడుతున్నారు. రాష్ట్ర ప్రభుత్వం శాసనసభలో ఆమోదించిన బిల్లు ప్రకారం సీఆర్‌డీఏ చట్టంలో ప్రతిపాదించిన సవరణలేంటి? దానివల్ల ప్రభుత్వానికి దఖలుపడే అధికారాలేమిటంటే..

చట్టంలో ఏముంది?

సీఆర్‌డీఏ చట్టంలోని సెక్షన్‌ 41 (1) ప్రకారం.. రాజధాని వ్యూహ ప్రణాళిక, బృహత్‌ ప్రణాళిక, మౌలిక వసతుల అభివృద్ధి ప్రణాళిక, ప్రాంతీయ అభివృద్ధి ప్రణాళికల్లో మార్పులు చేయాలంటే రాజధాని పరిధిలోని స్థానిక సంస్థల నుంచి ప్రతిపాదన రావాలి.

అది సముచితం, అవసరం అనుకుంటే దానిపై సీఆర్‌డీఏ అథారిటీ నిర్ణయం తీసుకోవాలి.

చేసిన మార్పేంటి?

1. స్థానిక సంస్థలకు ఎన్నికైన పాలక మండళ్లు లేనప్పుడు, దానికి పర్సన్‌ ఇన్‌ఛార్జిగా ఉన్న అధికారి నుంచి ప్రతిపాదన వచ్చినా ప్లాన్లలో సీఆర్‌డీఏ సవరణ చేసేయొచ్చు.

2. స్థానిక సంస్థల నుంచి ప్రతిపాదన రాకపోయినా సీఆర్‌డీఏ సొంతంగా నిర్ణయం తీసేసుకోవచ్చు.

3. భూమి యజమాని ఎవరి నుంచైనా విజ్ఞప్తి వచ్చినా పరిశీలించి నిర్ణయం తీసుకోవచ్చు.

ప్రభుత్వానికి వచ్చే అధికారం

గత ప్రభుత్వం నవ నగరాల థీమ్‌తో రాజధాని నిర్మాణం తలపెట్టి, మాస్టర్‌ప్లాన్‌ సహా వివిధ రకాల ప్రణాళికలను ప్రముఖ సంస్థలతో సిద్ధం చేయించింది. ఏ ప్రాంతంలో ప్రభుత్వ కార్యాలయాలు రావాలి? నివాస ప్రాంతాలు ఎక్కడుండాలి? రాజధానికి భూములిచ్చిన రైతులకు ఎక్కడ స్థలాలు కేటాయించాలి? వాణిజ్య ప్రాంతాలు, ఆసుపత్రులు ఎక్కడుండాలి? ఎలాంటి పరిశ్రమలు రావాలి? వాటికి ఎక్కడ స్థలం కేటాయించాలి వంటి వివరాలన్నీ చాలా విపులంగా, స్పష్టంగా పొందుపరిచారు. సీఆర్‌డీఏ చట్టాన్ని ప్రభుత్వం ఇష్టానుసారం మార్చడానికి వీల్లేకుండా కట్టుదిట్టం చేశారు. ఇప్పుడు చట్టాన్ని సవరించడం ద్వారా.. ప్రభుత్వం తన ఇష్టానికి అనుగుణంగా మాస్టర్‌ప్లాన్‌ సహా వివిధ ప్లాన్లలో మార్పులు చేసేందుకు వెసులుబాటు లభిస్తుంది. రాజధాని గ్రామాల్లో పంచాయతీలకు ఎన్నికలు జరగలేదు. అక్కడ ఎన్నికైన పాలకమండళ్లు లేవు. కాబట్టి పర్సన్‌ ఇన్‌ఛార్జులతో ఒక ప్రతిపాదన తెప్పించుకుని ప్రభుత్వం మాస్టర్‌ప్లాన్‌లో మార్పులు చేసేయొచ్చు. ప్రభుత్వం కావాలనుకుంటే తనంత తానుగా కూడా నిర్ణయాలు తీసుకునేలా చట్టాన్ని సవరించడంవల్ల మాస్టర్‌ప్లాన్‌లో ఇష్టానుసారం మార్పులు చేసేయొచ్చు. మౌలిక వసతుల ప్రణాళికనూ కుదించవచ్చు.

ప్రజాభిప్రాయం ఇక నామమాత్రమే!

చట్టంలో ఏముంది?

రాజధాని అభివృద్ధి ప్రణాళికల్లో ఏమైనా మార్పులు చేసే ముందు.. ఆ విషయాన్ని ప్రజలకు తెలియజేయాలి. పదిహేను రోజుల గడువిచ్చి.. వారి అభ్యంతరాలు, సూచనలను స్వీకరించాలి.

చేసిన మార్పేంటి?

ప్లాన్లలో మార్పులు చేయాలని ప్రభుత్వం తనంతట తాను నిర్ణయం తీసుకున్నప్పుడు... కేవలం ప్రజల నుంచే కాకుండా, స్థానిక సంస్థల నుంచి  అభిప్రాయం తీసుకోవాలని సవరించారు.

ప్రభుత్వానికి వచ్చే అధికారం

* స్థానిక సంస్థల పాలక మండళ్లు/ పర్సన్‌ ఇన్‌ఛార్జులు దాదాపుగా ప్రభుత్వానికి అనుకూలంగానే ఉంటారు కాబట్టి వారుచెప్పిందే చెల్లుబాటవుతుంది. ప్రజాభిప్రాయం నామమాత్రమే అవుతుంది.

* తుళ్లూరు మండలంలోని 19, మంగళగిరి మండలంలోని మూడు పంచాయతీల్ని కలిపి... మొత్తం 22 పంచాయతీలతో అమరావతిని మున్సిపాలిటీ చేయాలని ప్రభుత్వం నిర్ణయించింది. ప్రజాభిప్రాయ సేకరణకు గ్రామసభలు నిర్వహించగా ప్రజలంతా మున్సిపాలిటీ ప్రతిపాదనను ముక్తకంఠంతో వ్యతిరేకించారు. ఇప్పుడు వారి అభిప్రాయంతో సంబంధం లేకుండా ప్రభుత్వం ముందుకెళ్లే అవకాశం ఉంది.

ప్రభుత్వ పథకాలన్నింటి కిందా ఇళ్లు

చట్టంలో ఏముంది?

సీఆర్‌డీఏ చట్టంలోని సెక్షన్‌ 2(22)లో భూసమీకరణ పథకానికి నిర్వచనం చెబుతూ... రైతుల నుంచి స్వచ్ఛందంగా భూములు సమీకరించి, దానిలో పార్కులు వంటి ప్రజావసరాలకు, ఆర్థికంగా బలహీనవర్గాలకు సామాజిక గృహ నిర్మాణానికి, పాఠశాలలు, ఆసుపత్రులు వంటి సామాజిక వసతులకు, రోడ్లు వంటి మౌలిక వసతులకు, వాటన్నిటి అభివృద్ధికి కావలసిన నిధుల సమీకరణకు అవసరమైన భూమిని తీసివేసి, మిగతా భూమిలో మౌలిక వసతులు అభివృద్ధి చేసి రైతులకు స్థలాలు అప్పగించడం అని పేర్కొన్నారు.

చేసిన మార్పేంటి?

ఆర్థికంగా వెనుకబడిన వర్గాలకు సామాజిక గృహ నిర్మాణం అని ఉన్నచోట... కేంద్ర, రాష్ట్ర ప్రభుత్వ పథకాల కింద ఇళ్ల నిర్మాణానికి ఇళ్ల పట్టాలు ఇచ్చేందుకు అని చేర్చారు.

ప్రభుత్వానికి వచ్చే అధికారం

ప్రభుత్వం రాజధాని మాస్టర్‌ప్లాన్‌లో మార్పులు చేసేసి, ఎక్కడ కావాలంటే అక్కడ కేంద్ర, రాష్ట్ర ప్రభుత్వాల గృహ నిర్మాణ పథకాల కింద ఎంత మందికి కావాలంటే అంత మందికి ఇళ్ల పట్టాలిచ్చే వెసులుబాటు లభిస్తుంది.

రాజధానిలో ఎవరికైనా ఇళ్ల స్థలాలిచ్చే అధికారం

చట్టంలో ఏముంది?

సీఆర్‌డీఏ చట్టంలో ఇప్పుడు కొత్తగా 53(1) అన్న సెక్షన్‌ చేర్చారు

చేసిన మార్పేంటి?

కేంద్ర, రాష్ట్ర ప్రభుత్వ గృహ నిర్మాణ పథకాల కింద రాష్ట్రంలోని ఏ ప్రాంతంలోని వారైనా రాజధానిలో ఇళ్ల పట్టాలు పొందవచ్చు. కేవలం రాజధాని గ్రామాలు, సీఆర్‌డీఏ పరిధిలోని వారికి మాత్రమే రాజధానిలో ఇళ్ల స్థలాల్ని పరిమితం చేయరాదు.

ప్రభుత్వానికి వచ్చే అధికారం

విజయవాడతో పాటు, గుంటూరు జిల్లాలోని పెదకాకాని, మంగళగిరి వంటి ప్రాంతాలకు చెందిన సుమారు 54 వేల మందికి రాజధానిలో 1,251 ఎకరాల్ని పట్టాలుగా ఇచ్చేందుకు గతంలో ప్రభుత్వం ప్రయత్నించింది. మాస్టర్‌ప్లాన్‌ను ఇష్టం వచ్చినట్టు మార్చడం కుదరదన్న హైకోర్టు.. ఇళ్లస్థలాల పట్టాలిచ్చే జీవోను కొట్టేసింది. సీఆర్‌డీఏ చట్టాన్ని సవరించిన నేపథ్యంలో ప్రభుత్వానికి మళ్లీ ఆ ప్రయత్నం చేసేందుకు వెసులుబాటు లభిస్తుంది.

Read latest Ap top news News and Telugu News

Follow us on Facebook, Twitter, Instagram, Koo, ShareChat, and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

సుఖీభవ

మరిన్ని