సివిల్‌ అసిస్టెంట్‌ సర్జన్‌ నియామక తుది జాబితా రద్దు

సవరించిన జాబితాపై 26 వరకు అభ్యంతరాల స్వీకరణ

ఈనాడు, అమరావతి: రాష్ట్ర ప్రజారోగ్య శాఖలో సివిల్‌ అసిస్టెంట్‌ సర్జన్‌ (సీఏఎస్‌) పోస్టుల భర్తీకి ప్రకటించిన జాబితాను వైద్య ఆరోగ్య శాఖ అధికారులు రద్దు చేశారు. అందులో దొర్లిన తప్పులు సవరించి, మళ్లీ రివైజ్డ్‌ తుది ఎంపిక జాబితాను ప్రకటించారు. దీనిపై అభ్యర్థుల నుంచి ఈనెల26 వరకు అభ్యంతరాలు స్వీకరిస్తున్నారు. ఈ పరిణామం వైద్య ఆరోగ్య శాఖలో చర్చనీయాంశంగా మారింది. సీఏఎస్‌ రిక్రూట్‌మెంట్‌ (నోటిఫికేషన్‌ నంబరు-04/2022) ప్రకారం అభ్యర్థుల నుంచి దరఖాస్తులు స్వీకరించారు. విదేశాల్లో వైద్య విద్య పూర్తి చేసిన వారి మార్కుల మెమోలో పేర్కొన్న మెయిన్‌, లాంగ్వేజి సబ్జెక్టులు, స్టడీ అవర్స్‌, మార్కులు గుర్తించి ప్రాధాన్య క్రమంలో అభ్యర్థుల జాబితా తయారీలో తప్పులు జరిగినట్లు తెలిసింది. అలాగే ఒప్పంద విధానంలో వైద్య ఆరోగ్య శాఖలోనే వివిధ యూనిట్స్‌లో పని చేసిన వారికి ప్రాధాన్య మార్కుల కేటాయింపు తీరును ప్రశ్నిస్తూ పలువురు కోర్టును ఆశ్రయించారు. ఈ పరిణామాల నేపథ్యంలో రివైజ్డ్‌ తుది జాబితాను వెబ్‌సైట్‌లో ఉంచినట్లు అధికారులు శనివారం తెలిపారు. దీనిపై ఇప్పుడు అభ్యంతరాలను తీసుకుంటారు. తొలి జాబితాలో ఎంపికైన వారే దాదాపుగా దీనిలోనూ ఉన్నారని పేర్కొన్నారు.