40 టన్నుల ‘ద్రవ ఉక్కు’ నేలపాలు

విశాఖపట్నం (గాజువాక), న్యూస్‌టుడే: విశాఖపట్నం ఉక్కు కర్మాగారం బ్లాస్ట్‌ఫర్నేస్‌-1లో 40 టన్నుల ద్రవ ఉక్కు నేలపాలైంది. శనివారం ద్రవ ఉక్కును తరలించేందుకు రెండు టార్ఫిడో లాడిల్‌ కార్లు (టీఎల్‌సీ) ట్రాక్‌పై ఉన్నాయి. ఒక టార్ఫిడో లాడిల్‌ కారులో ద్రవ ఉక్కు నిండిపోయిన తర్వాత.. వాల్వును మరో కారులోకి తిప్పాల్సి ఉండగా సాంకేతిక సమస్యతో అది తిరగలేదు. దీంతో సుమారు 40 టన్నుల ద్రవ ఉక్కు నేలమీద పడటంతో.. మంటలు చెలరేగి టీఎల్‌సీలకు వ్యాపించాయి. వెంటనే అగ్నిమాపక సిబ్బంది అక్కడికి చేరుకుని మంటల్ని అదుపు చేశారు. సంబంధిత విభాగం అధికారులు, సిబ్బంది కలిసి రెండు రైలు ఇంజిన్ల సాయంతో వాటిని బయటకు తీసి మరమ్మతులు ప్రారంభించారు. కొంత మేర ట్రాక్‌ దెబ్బతిన్నట్లు విశ్వసనీయ సమాచారం.