ఆరోగ్య విశ్వవిద్యాలయం పేరు మార్చడం చారిత్రక తప్పిదం

ప్రవాసాంధ్రుల ఆగ్రహం

ఈనాడు డిజిటల్‌, అమరావతి: విజయవాడలోని ఆరోగ్య విశ్వవిద్యాలయానికి ఎన్టీఆర్‌ పేరు తొలగించడంపై అమెరికాలోని ప్రవాసాంధ్రులు మండిపడ్డారు. పేరు మార్పు నిర్ణయాన్ని చారిత్రక తప్పిదంగా అభివర్ణించారు. ప్రపంచవ్యాప్తంగా ఎన్టీఆర్‌ శత జయంతి వేడుకలు జరుగుతున్న వేళ తెలుగువారందరినీ జగన్‌ అవమానపరిచారని ధ్వజమెత్తారు. అమెరికాలోని వాషింగ్‌టన్‌ డీసీ మెట్రో ప్రాంతంలో ఎన్టీఆర్‌ పేరు మార్పు నిర్ణయానికి వ్యతిరేకంగా ప్రవాసాంధ్రులు నిరసన కార్యక్రమం నిర్వహించారు.  ‘‘గతంలో తెదేపా ప్రభుత్వం కూడా ఇలాగే ఆలోచించి ఉంటే వైఎస్సార్‌ జ్ఞాపకాలు మిగిలేవి కావు’’ అని పేర్కొన్నారు. కార్యక్రమంలో గుంటూరు మిర్చి యార్డు మాజీ ఛైర్మన్‌ మన్నవ సుబ్బారావు, భాను మాగులూరి, వీరనారాయణ, సీతారామారావు పాల్గొన్నారు.