కొద్దిసేపు కూర్చోండి తల్లీ!

చేయూత పంపిణీ కార్యక్రమంలో అధికారుల పాట్లు

కేవీబీపురం, న్యూస్‌టుడే: ‘అమ్మా.. కొద్దిసేపు కూర్చోండి తల్లీ.. ఆ తరువాత వెళ్లిపోదురు..’ అంటూ అధికారులు బతిమిలాడాల్సిన పరిస్థితి ఏర్పడింది. తిరుపతి జిల్లా కేవీబీపురం మండలంలో సోమవారం వైఎస్‌ఆర్‌ చేయూత మూడో విడత నగదు పంపిణీ కార్యక్రమానికి ఎమ్మెల్యే ఆదిమూలం ముఖ్యఅతిథిగా హాజరయ్యారు. కార్యక్రమానికి మండలం నలుమూలల నుంచి అర్హులైన లబ్ధిదారులను చేరవేసే పనిలో వైఎస్‌ఆర్‌ క్రాంతిపథం అధికారులు.. వాలంటీర్ల ద్వారా చొరవ తీసుకున్నారు. ఎంపీడీవో కార్యాలయం వద్ద తాగునీరు, నీడ లాంటి కనీస సౌకర్యాలు లేకపోవడంతో ఎమ్మెల్యే ప్రసంగించక ముందే మహిళలు సభాప్రాంగణం నుంచి తిరుగుముఖం పట్టారు. వారిని వెళ్లనీయకుండా నియంత్రించేందుకు ప్రధాన ద్వారం వద్ద మూడు ద్విచక్రవాహనాలను వైకాపా శ్రేణులు అడ్డుపెట్టినా లెక్కచేయకుండా మహిళలు అక్కడి నుంచి వెళ్లిపోయారు.