వారికీ పదవీ విరమణ వయసు 62 ఏళ్లు చేస్తాం

మంత్రి బొత్స

ఈనాడు, అమరావతి: ‘సొసైటీలు, గురుకులాలు, వర్సిటీ బోధనేతర సిబ్బంది, ఎయిడెడ్‌ ఉపాధ్యాయులకు పదవీ విరమణ వయసు పెంపు చేస్తామని సీఎం జగన్‌ హామీ ఇచ్చారు. దానికనుగుణంగా వీరికి పదవీ విరమణ వయసు 62 ఏళ్లు చేస్తాం. ఎవరూ ఆందోళన చెందాల్సిన పని లేదు’ అని మంత్రి బొత్స సత్యనారాయణ స్పష్టం చేశారు. అలాగే పురపాలక పాఠశాలల ప్రధానోపాధ్యాయులకు అక్టోబరు నుంచి డీడీవో అధికారాలు ఇస్తామన్నారు. దీంతో జీతాలు, సెలవులు లాంటి సమస్యలకు పరిష్కారం లభిస్తుందన్నారు. పురపాలక ఉపాధ్యాయుల సమస్యలపై విజయవాడలో సోమవారం ఉపాధ్యాయ సంఘాల నాయకులతో మంత్రి బొత్స చర్చించారు. అనంతరం ఆయన మాట్లాడుతూ.. ‘పురపాలక ఉపాధ్యాయులకు సమస్యలు ఉన్నాయి. వేతనాలు, సెలవుల సమస్యను పరిష్కరించాం. మిగతా వాటిని త్వరలోనే పరిష్కరిస్తామని చెప్పాం. విజయనగరంలో పైడితల్లి జాతర ఉంటుందని, దసరా సెలవుల్లో మార్పు చేయాలని అక్కడ వారు కోరారు. దసరా సెలవుల్లో పని చేస్తామని, ఆ తర్వాత నాలుగు రోజులు పొడిగించాలని కోరారు. విజయనగరం వరకు సెలవులకు ఆదేశాలు ఇస్తాం...’ అని వివరించారు.