ఏపీఐఐసీ స్వర్ణోత్సవ లోగోను ఆవిష్కరించిన సీఎం జగన్‌

ఈనాడు, అమరావతి: పారిశ్రామికవాడల అభివృద్ధికి రాష్ట్ర పారిశ్రామిక మౌలిక సదుపాయాల కల్పనా సంస్థ (ఏపీఐఐసీ) నిరంతరం కృషి చేయాలని ముఖ్యమంత్రి జగన్‌ కోరారు. ఏపీఐఐసీ 50వ ఏడాదిలోకి అడుగుపెట్టిన సందర్భంగా స్వర్ణోత్సవ లోగోను సీఎం తాడేపల్లిలోని క్యాంపు కార్యాలయంలో సోమవారం ఆవిష్కరించారు. ఈ సందర్భంగా ఏడాదిలో నిర్వహించనున్న స్వర్ణోత్సవ వేడుకల వివరాలను ఏపీఐఐసీ అధికారులు ముఖ్యమంత్రికి వివరించారు. సీఎం అందించిన స్ఫూర్తితో పారిశ్రామిక పార్కులు, మౌలిక సదుపాయాల అభివృద్ధిపై దృష్టి పెడతామని పేర్కొన్నారు. ఈ కార్యక్రమంలో మంత్రి అమర్‌నాథ్‌, ఏపీఐఐసీ ఛైర్మన్‌ మెట్టు గోవిందరెడ్డి, సంస్థ వైస్‌ ఛైర్మన్‌, ఎండీ సుబ్రమణ్యం పాల్గొన్నారు. స్థిరమైన ఆర్థిక వృద్ధి, హరిత పారిశ్రామికీకరణ పరంగా చేస్తున్న ప్రయత్నాలను తెలిపేలా స్వర్ణోత్సవ లోగోను నాలుగు రంగులతో రూపొందించినట్లు ఏపీఐఐసీ తెలిపింది.