ప్రభుత్వ న్యాయవాదులకు రెండున్నరేళ్లుగా అందని జీతాలు

గుంటూరు లీగల్‌, న్యూస్‌టుడే: రాష్ట్రవ్యాప్తంగా ఉమ్మడి 13 జిల్లాల్లోని జిల్లా కోర్టులు, దిగువ న్యాయస్థానాల్లో విధులు నిర్వహిస్తున్న ప్రభుత్వ న్యాయవాదులకు రెండున్నరేళ్లుగా జీతాలు అందడం లేదు. వైకాపా ప్రభుత్వం వచ్చిన తరువాత రాష్ట్రవ్యాప్తంగా అన్ని జిల్లా కోర్టులు, దిగువ న్యాయస్థానాల్లో ప్రభుత్వ న్యాయవాదులను మూడేళ్ల పదవీకాలానికి నియమించారు. ఈ పదవీకాలం మరికొద్ది నెలల్లో పూర్తవుతుంది. 2014లో అప్పటి ప్రభుత్వం ప్రభుత్వ న్యాయవాదుల వేతనాలను రూ.15 వేల నుంచి రూ.30 వేలకు, సహాయ ప్రభుత్వ న్యాయవాదులకు రూ.9 వేల నుంచి రూ.18 వేలకు, జూనియర్‌ సివిల్‌ జడ్జి కోర్టుల్లో రూ.5 వేల నుంచి 10 వేలకు పెంచుతూ ఉత్తర్వులిచ్చింది. ఈ వేతనాలను తమకు 2020 జనవరి నుంచి చెల్లించడం లేదని న్యాయవాదులు ఆవేదన వ్యక్తం చేస్తున్నారు.