దుర్గమ్మను దర్శించుకున్న గవర్నర్‌

ఇంద్రకీలాద్రి, న్యూస్‌టుడే: దసరా సందర్భంగా విజయవాడలోని దుర్గమ్మ ఆలయాన్ని గవర్నర్‌ బిశ్వభూషణ్‌ హరిచందన్‌ దంపతులు దర్శించుకున్నారు. దేవాదాయ శాఖ మంత్రి కొట్టు సత్యనారాయణ, కలెక్టర్‌ ఢిల్లీరావు, దేవస్థానం ఈవో భ్రమరాంబ, సీపీ కాంతిరాణా టాటా, ప్రత్యేక అధికారి రామచంద్రమోహన్‌ వారికి స్వాగతం పలికారు. అనంతరం గవర్నర్‌కు దేవస్థానం ప్రధానార్చకులు దుర్గాప్రసాద్‌, కలెక్టర్‌, ఈవోలు అమ్మవారి చిత్రపటాన్ని, ప్రసాదాలను అందజేశారు. ఈ సందర్భంగా గవర్నర్‌ మాట్లాడుతూ.. జగన్మాత ఆశీస్సులతో రాష్ట్రం అన్ని రంగాల్లో సర్వతోముఖాభివృద్ధి చెందాలని ఆకాంక్షించారు. అమ్మవారి స్నపనాభిషేకం పూర్తయిన తరువాత 9 గంటలకు భక్తులను దర్శనానికి అనుమతించారు. దసరా ఉత్సవాల తొలి రోజున 30 వేల మంది అమ్మవారిని దర్శించుకున్నారని దేవస్థానం అధికారులు తెలిపారు.