విరామంలోనూ నినాదం

సాంస్కృతిక ప్రదర్శనలతో అమరావతి రైతుల ఉత్సాహం

ఈనాడు డిజిటల్‌, ఏలూరు: మహా పాదయాత్రలో అలసిన అమరావతి రైతులు విరామం రోజునా నినదించారు. వారిని అలరించేందుకు కళాకారులు పలు సాంస్కృతిక కార్యక్రమాల్ని ప్రదర్శించారు. అమరావతి నుంచి అరసవల్లి దాకా చేపట్టిన మహా పాదయాత్ర సోమవారం ఏలూరు జిల్లాలోకి  ప్రవేశించింది. రైతులు మంగళవారం యాత్రకు విరామం ప్రకటించి, వట్లూరు క్రాంతి కల్యాణ మండపంలో బసచేశారు. వీరికి ఆటవిడుపు కోసం మాజీ ఎంపీ మాగంటి బాబు సాంస్కృతిక ప్రదర్శనలు ఏర్పాటు చేశారు. అమరావతి నేపథ్యంలో సాగే ఆటపాటలతో కళాకారులు అలరించారు. జయహో అమరావతి అంటూ ఇచ్చిన ప్రదర్శనకు రైతులు కుర్చీల్లోంచి లేచి కండువాలను గాలిలో తిప్పుతూ ఉత్సాహం కనబరిచారు. ఏకైక రాజధానిగా అమరావతే ఉండాలని నిస్వార్థ చింతనతో యాత్రలో పాల్గొంటున్న అన్నదాతలకు పలువురు నాయకులు, స్థానికులు పాదాభివందనం చేశారు. పాదయాత్ర బుధవారం ఏలూరు, దెందులూరు మండలాల్లో కొనసాగనుంది.